ഷെയറുകള്‍ (ബിസിനസ് നിക്ഷേപങ്ങള്‍), കമ്പനികള്‍ തുടങ്ങിയവയുടെ സകാത്ത്:

بسم الله ، الحمد لله والصلاة والسلام على رسول الله ، وبعد؛

ബിസിനസിലും മറ്റും നിക്ഷേപിച്ച ഷെയറുകളുടെ സകാത്ത് എപ്രകാരമാണ് നല്‍കേണ്ടത് എന്നത് ചര്‍ച്ച ചെയ്യുമ്പോള്‍ ഷെയറുകളുടെ രൂപം. കമ്പനിയുടെ രൂപം തുടങ്ങിയവ പരിഗണിക്കേണ്ടതുണ്ട്.
     
ഷെയറുകള്‍ തന്നെ വില്‍ക്കുവാന്‍ ഉദ്ദേശിക്കുന്നവ ആണ് എങ്കില്‍ ആ ഷെയറിന്റെ മാര്‍ക്കറ്റ് വിലയുടെ രണ്ടര ശതമാനം സകാത്തായി നല്‍കണം. അഥവാ കച്ചവട വസ്തുവിന്‍റെ സകാത്താണ് അതിനു ബാധകമാകുക ഇവിടെ ഷെയര്‍ തന്നെ കച്ചവട വസ്തുവായി പരിഗണിക്കപ്പെടും.

എന്നാല്‍ വില്‍പനക്ക് വെച്ചിട്ടുള്ളതല്ലാത്ത ലാഭം പ്രതീക്ഷിച്ചുകൊണ്ട് ഉള്ള ഷെയറുകളുടെ സകാത്ത് ഇതില്‍ നിന്നും വിഭിന്നമാണ്. കമ്പനികള്‍ രണ്ടുവിധമാണ്. ഉത്പന്നങ്ങള്‍ കച്ചവടം ചെയ്യുന്ന കമ്പനികളും. സേവനങ്ങള്‍ നല്‍കുന്ന കമ്പനികളും.

ഉത്പന്നങ്ങള്‍ വില്‍ക്കുന്ന കമ്പനികളില്‍ ആണ് ഷെയര്‍ എങ്കില്‍ കമ്പനിയുടെ അസറ്റ്സ് അഥവാ ഉപയോഗ വസ്തുക്കള്‍ കഴിച്ച് കൈവശമുള്ള പണത്തിനും കച്ചവട വസ്തുക്കള്‍ക്കുമാണ് സകാത്ത് നല്‍കേണ്ടത്. അഥവാ കമ്പനിയുടെ ഓഫീസ്, ഡെലിവറി വാഹനങ്ങള്‍, മെഷിനറീസ്, ബില്‍ഡിങ്ങുകള്‍ തുടങ്ങിയവക്ക് സകാത്ത് ബാധകമല്ല. മറിച്ച് കച്ചവട വസ്തുക്കള്‍ക്കാണ് സകാത്ത് ബാധകം. അതിനാല്‍ കമ്പനിയുടെ കൈവശമുള്ള ‘ലിക്വിഡ് കാശ്’ അഥവാ പണം, അതുപോലെ അവരുടെ കൈവശമുള്ള കച്ചവടവസ്തുക്കളുടെ മാര്‍ക്കറ്റ് വില, ലഭിക്കുവാനുള്ള അവധിയെത്തിയ കടങ്ങള്‍ (കൂടുതല്‍ സൂക്ഷ്മത ആഗ്രഹിക്കുന്നവര്‍ക ലഭിക്കുമെന്ന് ഉറപ്പുള്ള അവധി എത്തിയിട്ടില്ലാത്ത കടങ്ങളും കൂട്ടുക) എന്നിവ കണക്കുകൂട്ടി, അതില്‍ നിന്നും കടം വീട്ടുവാനുണ്ടെങ്കില്‍ എത്രയാണോ വീട്ടുന്നത് അത് മാത്രം മാറ്റിവെച്ച് ബാക്കിയുള്ള പണത്തിന്‍റെ രണ്ടര ശതമാനം സകാത്തായി നല്‍കണം. ഇത് പലപ്പോഴും വ്യക്തികള്‍ക്ക് കണക്കുകൂട്ടാന്‍ സാധിക്കില്ല. അതിനാലാണ് കമ്പനികള്‍ തന്നെ സകാത്ത് കണക്കുകൂട്ടി ഓരോ വ്യക്തിയെയും അറിയിക്കുകയോ, അതല്ലെങ്കില്‍ അവരുടെ അറിവോടെ സകാത്ത് നല്‍കുകയോ ചെയ്യണം എന്ന് നമ്മള്‍ പറയാറുള്ളത്.

ഇനി കമ്പനി സകാത്ത് കണക്ക് കൂട്ടാറില്ല എങ്കില്‍ കമ്പനിയുടെ അസറ്റ്സ് കഴിച്ച് ബാക്കിയുള്ളവയില്‍ തന്റെ ഓഹരി എത്ര ശതമാനമാണോ അതിന്‍റെ രണ്ടര ശതമാനം നല്‍കണം. ഇനി കമ്പനിയുടെ അസറ്റ്സിനെ സംബന്ധിച്ചോ, കച്ചവട വസ്തുക്കളെ സംബന്ധിച്ചോ കൃത്യമായ ധാരണ ഇല്ലാത്തവര്‍ തങ്ങള്‍ നിക്ഷേപിച്ച മുഴുവന്‍ നിക്ഷേപത്തിന്‍റെയും ഇപ്പോഴുള്ള വില എത്രയാണോ അത് കണക്കാക്കി അതിന്‍റെ രണ്ടര ശതമാനം സകാത്ത് നല്‍കണം. കാരണം എത്രയാണ് സകാത്ത് ബാധകമാകുന്ന സ്വത്ത് എന്ന് അറിയില്ലല്ലോ.

ഉദാ: മൂന്ന്‍ പേര്‍ ചേര്‍ന്ന് പണം നിക്ഷേപിച്ച് ഒരു സൂപ്പര്‍മാര്‍ക്കറ്റ് തുടങ്ങി എന്ന് കരുതുക. ഒരു ഹിജ്റ വര്‍ഷക്കാലം തികയുമ്പോള്‍ ആ സൂപ്പര്‍മാര്‍ക്കറ്റിന്റെ സകാത്ത് കണക്കു കൂട്ടാന്‍ ചെയ്യേണ്ടത് ഇപ്രകാരമാണ്.

1- കടയുടെ പേരിലുള്ള മൊത്തം പണം, തിരിച്ചു കിട്ടാന്‍ അവധിയെത്തിയ കടങ്ങള്‍, കടയിലെ മൊത്തം കച്ചവടവസ്തുക്കളുടെ അഥവാ സ്റ്റോക്കിന്റെ മാര്‍ക്കറ്റ് വില തുടങ്ങിയവ കണക്കുകൂട്ടുക.

2- മറ്റുള്ളവര്‍ക്ക് കൊടുക്കാനുള്ള കടം, തത് സമയത്ത് തിരിച്ചുകൊടുക്കുന്നുവെങ്കില്‍ മാത്രം, തിരിച്ചുകൊടുക്കുന്ന സംഖ്യ ആ സംഖ്യയില്‍ നിന്നും കുറയ്ക്കുക.

3- സ്വാഭാവികമായും കടയുടെ കൈവശമുള്ള മൊത്തം പണം കണക്കുകൂട്ടുമ്പോള്‍ ലാഭമായോ മറ്റോ കടക്ക് ലഭിച്ച പണങ്ങളും കണക്കില്‍ പെട്ടു. ലാഭം പ്രത്യേകം കൂട്ടേണ്ടതില്ല.

4- എല്ലാം കൂട്ടിക്കിഴിച്ച് കിട്ടുന്ന മൊത്തം സംഖ്യയുടെ രണ്ടര ശതമാനം സകാത്തായി നല്‍കുക. രണ്ടര ശതമാനം കാണാന്‍ മൊത്തം സംഖ്യയെ നാല്‍പത് കൊണ്ട് ഹരിച്ചാല്‍ മതി.

ഇത് കമ്പനി സകാത്ത് കണക്കുകൂട്ടുന്നുവെങ്കിലാണ്. വ്യക്തികള്‍ക്കാണ് സകാത്ത് ബാധകം എങ്കിലും കമ്പനികള്‍ തന്നെ കണക്കുകൂട്ടുന്നതാണ് നല്ലത്. എന്നാല്‍ ഇതേ വിഷയത്തില്‍ കമ്പനി സകാത്ത് കണക്കുകൂട്ടുന്നില്ല എങ്കില്‍.

ആകെ കമ്പനിയുടെ അസറ്റ്സ് കഴിച്ച് ബാക്കിയുള്ള കച്ചവട വസ്തുക്കളും കാശും എത്രയുണ്ട് എന്ന് നോക്കുക. അതില്‍ തനിക്ക് ഉള്ള ഷെയറിന്റെ ശതമാനം എത്രയാണോ അതിന്‍റെ രണ്ടര ശതമാനം നല്‍കുക.

ഉദാ: നേരത്തെ പറഞ്ഞ സൂപ്പര്‍മാര്‍ക്കറ്റില്‍ ഉള്ള ഒരാള്‍ സ്വയം അയാളുടെ സകാത്ത് കണക്കുകൂട്ടുകയാണ് എങ്കില്‍ സൂപ്പര്‍മാര്‍ക്കറ്റിന്റെ അസറ്റ്സ് കഴിച്ച് ബാക്കിയുള്ള കച്ചവട വസ്തുക്കളും പണവും അതുപോലെ ലഭിക്കുവാനുള്ള കടങ്ങളും എത്രയാണ് എന്ന് നോക്കുക. അതില്‍ നിന്നും കമ്പനി തത്’വര്‍ഷത്തില്‍ തിരിച്ചടക്കാന്‍ തീരുമാനിച്ച കടങ്ങള്‍ കിഴിക്കുക. ശേഷം കിട്ടിയ സംഖ്യ 60 ലക്ഷമാണ് എന്ന് സങ്കല്‍പ്പിക്കുക. മൂന്ന് പേര്‍ ചേര്‍ന്നുള്ള സംരംഭമായതിനാല്‍ ഒരാളുടെ വിഹിതമായി 20 ലക്ഷം ഉണ്ടാകും. അതിന്‍റെ രണ്ടര ശതമാനം സകാത്തായി നല്‍കണം. അഥവാ 2000000 ÷40 = അതായത് 50000 സകാത്തായി നല്‍കണം.

ഇനി ഇപ്രകാരം കണക്ക് കൂട്ടാന്‍ ഒരു നിക്ഷേപകന് സാധിക്കാത്ത പക്ഷം തന്‍റെ ഷെയറിന്റെ ഇപ്പോഴുള്ള മൊത്തം മൂല്യം കണക്കാക്കി അതിന്‍റെ രണ്ടര ശതമാനം സകാത്തായി നല്‍കണം.

ഇതുവരെ നമ്മള്‍ ചര്‍ച്ച ചെയ്തത് ഉല്പന്നങ്ങള്‍ വില്‍ക്കുന്ന കമ്പനിയെ സംബന്ധിച്ചാണ്.

എന്നാല്‍ ഹോസ്പിറ്റല്‍, ട്രാവെല്‍സ്, ഹോട്ടല്‍ തുടങ്ങി സേവനങ്ങള്‍ നല്‍കുന്ന ബിസിനസ് സംരംഭങ്ങളില്‍ നിക്ഷേപമുണ്ടെങ്കില്‍, ആ ഷെയര്‍ തന്നെ നാം വില്‍പനക്ക് വച്ചതാണ് എങ്കില്‍ നേരത്തെ സൂചിപ്പിച്ച പോലെ ആ ഷെയറിന്റെ മാര്‍ക്കറ്റ് വിലയുടെ രണ്ടര ശതമാനം സകാത്തായി നല്‍കണം. എന്നാല്‍ അതില്‍ നിന്നുമുള്ള വരുമാനം പ്രതീക്ഷിച്ചുകൊണ്ടുള്ള ഷെയര്‍ ആണ് എങ്കില്‍ സേവനങ്ങള്‍ നല്‍കുന്ന കമ്പനികളുടെ വരുമാനത്തിനും കൈവശമുള്ള ലിക്വിഡ് കാശിനും മാത്രമേ സകാത്ത് ബാധകമാകൂ. മൂലധനത്തിന് സകാത്ത് ബാധകമല്ല. അതുകൊണ്ട് തന്നെ അത്തരം ഒരു കമ്പനിയില്‍ നാം നിക്ഷേപിച്ചാല്‍ അതില്‍ നിന്നും ലഭിക്കുന്ന വരുമാനത്തിനാണ് സകാത്ത്. സ്വാഭാവികമായും അതിന്‍റെ ബില്‍ഡിംഗുകള്‍, വാഹനങ്ങള്‍, ഉപകരണങ്ങള്‍ തുടങ്ങിയവക്ക് സകാത്ത് ബാധകമാകുകയില്ല.

അതുകൊണ്ടുതന്നെ സേവനം നല്‍കുന്ന കമ്പനികള്‍, കമ്പനികള്‍ അവയുടെ സകാത്ത് കണക്കുകൂട്ടുകയാണ് എങ്കില്‍ ഒരു ഹിജ്റ വര്‍ഷം തികയുന്ന സമയത്ത് തങ്ങളുടെ കൈവശം പണമായി എത്രയുണ്ടോ അതിന്‍റെ രണ്ടര ശതമാനം സകാത്തായി നല്‍കണം. വ്യക്തിയാണ് സകാത്ത് കണക്കുകൂട്ടുന്നത് എങ്കില്‍ തനിക്ക് അതില്‍ നിന്നും ലഭിക്കുന്ന വരുമാനം തന്‍റെ കൈവശമുള്ള പണത്തിലേക്ക് ചേര്‍ത്തുവച്ച് ഹൗല്‍ തികയുന്ന സമയത്ത് എത്രയാണോ കൈവശമുള്ളത് അതിന്‍റെ രണ്ടര ശതമാനം സകാത്തായി നല്‍കിയാല്‍ മതി. നിക്ഷേപിച്ച മുഴുവന്‍ സഖ്യക്കും സകാത്ത് നല്‍കേണ്ടതില്ല. എന്നാല്‍ നേരത്തെ സൂചിപ്പിച്ച പോലെ തനിക്ക് ആ കമ്പനിയില്‍ ഉള്ള ഷെയര്‍ തന്നെ മറ്റൊരാള്‍ക്ക് വില്‍ക്കാന്‍ ഉദ്ദേശിക്കുന്നതാണ് എങ്കില്‍ ആ ഷെയറിന്റെ മാര്‍ക്കറ്റ് വിലയുടെ രണ്ടര ശതമാനം സകാത്തായി നല്‍കണം.

ഉദാ: ഒരാള്‍ ഒരു ഹോസ്പിറ്റലില്‍ 50 ലക്ഷം നിക്ഷേപിച്ചു എന്ന് കരുതുക. സ്വാഭാവികമായും ഹോസ്പിറ്റല്‍ ആ പണം ബില്‍ഡിംഗുകളും മെഡിക്കല്‍ ഉപകരണങ്ങളും സംവിധാനങ്ങളും സ്ഥാപിക്കുവാനാണല്ലോ ഉപയോഗിക്കുക. അവക്ക് സകാത്ത് ബാധകമല്ല. മറിച്ച് അവ ഉപയോഗിച്ചുകൊണ്ട് ഉണ്ടാക്കുന്ന വരുമാനത്തിനാണ് സകാത്ത്. ഹൗല്‍ തികയുന്ന സമയത്ത് തന്‍റെ സകാത്ത് കണക്കു കൂട്ടുമ്പോള്‍ കൈവശമുള്ള മൊത്തം പണം കണക്കുകൂട്ടി ഒരാള്‍ സകാത്ത് നല്‍കുമ്പോള്‍ സ്വാഭാവികമായും, തനിക്ക് ഈ നിക്ഷേപത്തില്‍ നിന്നും ലഭിച്ച സംഖ്യയില്‍ ബാക്കിയുള്ളതും അതില്‍ ഉള്‍പ്പെടുമല്ലോ. അഥവാ ഹൗല്‍ തികയുമ്പോള്‍ വരുമാനമായി ലഭിച്ചതില്‍ നിന്നും കൈവശം ബാക്കിയുള്ള സഖ്യക്കേ ഈ ഇനത്തില്‍ സകാത്ത് ബാധകമാകുന്നുള്ളൂ. ഇനി ഹോസ്പിറ്റല്‍ ആണ് സകാത്ത് കണക്കു കൂട്ടുന്നത് എങ്കില്‍. ഹൗല്‍ തികയുന്ന സന്ദര്‍ഭത്തില്‍ തങ്ങളുടെ കൈവശമുള്ള മൊത്തം ലിക്വിഡ് കാശിന്‍റെ രണ്ടര ശതമാനം സകാത്തായി നല്‍കിയാല്‍ മതി. ഹോസ്പിറ്റലിനോടൊപ്പം സ്റ്റോക്ക്‌ ഉള്ള മെഡിക്കല്‍ സ്റ്റോറു പോലുള്ള സംവിധാനങ്ങള്‍ ഉണ്ടെങ്കില്‍ അവയുടെ മൊത്തം സ്റ്റോക്കിന്റെ മാര്‍ക്കറ്റ് വില കൂടി കണക്കില്‍ ഉള്‍പ്പെടുത്തണം. കടത്തിന്‍റെ വിഷയം നേരത്തെ സൂചിപ്പിച്ചതുപോലെത്തന്നെ. ഹോസ്പിറ്റല്‍ പോലുള്ള സേവനങ്ങള്‍ നല്‍കുന്ന മറ്റു സംരഭങ്ങളുടെ കാര്യവും ഇതുപോലെത്തന്നെ.

അല്ലാഹു അനുഗ്രഹിക്കട്ടെ. 
______________________________

അബ്ദുറഹ്മാൻ അബ്ദുല്ലത്തീഫ് പി.എൻ  

ഒരു റമദാനിലെ നോമ്പ് നോറ്റുവീട്ടാതെ മറ്റൊരു റമദാനിലേക്ക് വൈകിപ്പിച്ചാല്‍ എന്താണ് ചെയ്യേണ്ടത് ?.

 الحمد لله و الصلاة والسلام على رسول الله ، وعلى آله و صحبه ومن والاه، وبعد؛

 നോമ്പ് നഷ്ടപ്പെട്ടവന്‍ ആ നോമ്പ് നോട്ടുവീട്ടണം എന്നത് പണ്ഡിതലോകത്ത് ഏകാഭിപ്രായം ഉള്ള കാര്യമാണ്. ഒരു റമദാനില്‍ നഷ്ടപ്പെട്ട നോമ്പ് അടുത്ത റമദാന്‍ വരുന്നതിനു മുന്നോടിയായി നോറ്റുവീട്ടുവാന്‍ സാധിക്കുമെങ്കില്‍ നിര്‍ബന്ധമായും അതിനു മുമ്പായിത്തന്നെ നോറ്റുവീട്ടണം. യാതൊരു കാരണവശാലും വൈകിപ്പിക്കാന്‍ പാടില്ല. ഇനി രോഗമോ, മുലകുടിയോ, ഗര്‍ഭമോ തുടങ്ങിയ കൃത്യമായ കാരണത്താല്‍ ഒരു റമദാനിലെ നോമ്പ് അടുത്ത റമദാനിന് മുന്നോടിയായി നോറ്റുവീട്ടാന്‍ സാധിക്കാതെ വന്നാല്‍, അത് പിന്നീടായാലും നോറ്റുവീട്ടുക തന്നെയാണ് വേണ്ടത്.
എന്നാല്‍ ഇവിടെയുള്ള സംശയം ഒരു റമദാനില്‍ നഷ്ടപ്പെട്ട നോമ്പ് മറ്റൊരു റമദാനിന് ശേഷമായി വൈകിപ്പിക്കുന്നവര്‍ നോറ്റു വീട്ടുന്നതോടൊപ്പം അഗതിക്ക് ഭക്ഷണവും നല്‍കേണ്ടതുണ്ടോ എന്നതാണ്. 

 ഒരു റമദാനിലെ നോമ്പ് മറ്റൊരു റമദാനിലേക്ക് നീട്ടിവെക്കുന്നവരെ രണ്ടായി തരം തിരിക്കാം:

ഒന്ന് : മുലയൂട്ടല്‍, പ്രസവം , ഗര്‍ഭം , രോഗം തുടങ്ങി വ്യക്തമായ കാരണം കൊണ്ട് നോമ്പ് നോറ്റു വീട്ടാന്‍ സാധിക്കാതെ വരുകയും, അപ്രകാരം വ്യക്തമായ കാരണത്താല്‍ ഒരു റമദാനിലെ നോമ്പ് മറ്റൊരു റമദാനിന്‍റെ ശേഷമെന്നോണം വൈകിപ്പിക്കുന്ന ആളുകള്‍.

രണ്ട് : ഒരു റമദാനില്‍ നഷ്ടപ്പെട്ട നോമ്പ് അടുത്ത റമദാന്‍ വന്നെത്തുന്നതിനു മുന്‍പ് നോറ്റുവീട്ടാന്‍ സാഹചര്യം ഉണ്ടായിരുന്നിട്ടും അകാരണമായി അടുത്ത റമദാനിനു ശേഷമെന്നോണം വൈകിപ്പിക്കുന്ന ആളുകള്‍.


ഇതില്‍ രണ്ടുപേരും നോമ്പ് നോറ്റുവീട്ടണം. എന്നാല്‍ ഒരു റമദാനിലെ നോമ്പ്   മറ്റൊരു റമദാനിലേക്ക് വൈകിപ്പിക്കാന്‍ കൃത്യമായ കാരണം ഉള്ളവര്‍ നോറ്റു വീട്ടിയാല്‍ മാത്രം മതി. നോറ്റു വീട്ടുന്നതോടൊപ്പം ഫിദ്‌യ  (അഥവാ ഓരോ ദിവസത്തിനും  അഗതിക്കുള്ള ഒരു നേരത്തെ ഭക്ഷണം എന്നോണം) നല്‍കേണ്ടതില്ല.

എന്നാല്‍ അകാരണമായി ഒരു റമദാനിലെ നോറ്റു വീട്ടാനുള്ള നോമ്പ് മറ്റൊരു റമദാനിനു ശേഷമാക്കി വൈകിപ്പിക്കുകയാണ് എങ്കില്‍, (ഇവിടെയും നോമ്പ് നോറ്റു വീട്ടണം എന്നതിലും, തൗബ ചെയ്യണം എന്നതിലും പണ്ഡിതന്മാര്‍ക്ക് എകാഭിപ്രായമാണ്). എന്നാല്‍ അകാരണമായി വൈകിപ്പിച്ചവര്‍ നോമ്പ് നോറ്റുവീട്ടുന്നതോടൊപ്പം വൈകിപ്പിച്ച ഓരോ ദിവസത്തിനും അഗതിക്ക് ഒരു നേരത്തെ ഭക്ഷണം കൂടി പ്രായശ്ചിത്തമായി നല്‍കേണ്ടതുണ്ടോ എന്നതില്‍ പണ്ഡിതന്മാര്‍ക്കിടയില്‍ അഭിപ്രായ ഭിന്നതയുണ്ട്. അഥവാ അകാരണമായി ഒരു റമദാനിലെ നോമ്പ് മറ്റൊരു റമദാനിലേക്ക് വൈകിപ്പിക്കുന്നവര്‍ നോറ്റുവീട്ടുകയും ഫിദ്'യ നല്‍കുകയും ചെയ്യണോ ?, അതോ നോറ്റുവീട്ടിയാല്‍ മാത്രം മതിയോ ? എന്നത് ഭിന്നാഭിപ്രായമുള്ള കാര്യമാണ്.

ഇമാം മാലിക്ക് (റ) , ഇമാം ശാഫിഇ (റ) , ഇമാം അഹ്മദ് (റ) തുടങ്ങിയവര്‍ അകാരണമായി വൈകിപ്പിച്ചവര്‍ നോമ്പ് നോറ്റുവീട്ടുന്നതോടൊപ്പം വൈകിപ്പിച്ച ഓരോ നോമ്പിനും പ്രായശ്ചിത്തമായി അഗതിക്ക് ഒരു നേരത്തെ ഭക്ഷണവും നല്‍കേണ്ടതുണ്ട് എന്ന അഭിപ്രായക്കാരാണ്. ഇബ്നു ഉമര്‍ (റ), ഇബ്നു അബ്ബാസ് (റ) , അബൂ ഹുറൈറ (റ) തുടങ്ങിയ സ്വഹാബികളില്‍ നിന്ന് അപ്രകാരം ഉദ്ദരിക്കപ്പെട്ടു എന്നതാണ് അവരുടെ തെളിവ്.  ഇമാം ഇബ്നു ഖുദാമ റഹിമഹുല്ലയും മുഗ്നിയില്‍ ഈ അഭിപ്രായമാണ് പ്രബലമായ അഭിപ്രായമായി രേഖപ്പെടുത്തുന്നത്.  അതുപോലെ ശൈഖ് സ്വാലിഹ് അല്‍ ഫൗസാന്‍ ഹഫിദഹുല്ലയുടെ ഫത്'വകള്‍ പരിശോധിച്ചാല്‍ അതിലും അകാരണമായി വൈകിപ്പിച്ചവര്‍ നോറ്റുവീട്ടുന്നതോടൊപ്പം അഗതിക്ക് ഒരുനേരത്തെ ഭക്ഷണവും നല്‍കണം എന്ന് പ്രസ്ഥാവിക്കുന്നത് കാണാം. ശൈഖ് ഇബ്നു ബാസ് (റഹിമഹുല്ല) യും ഈ അഭിപ്രായക്കാരനാണ് അദ്ദേഹത്തിന്‍റെ ഫത്'വ ഞാന്‍ ഇതിന്‍റെ അവസാനത്തില്‍ വിവര്‍ത്തനം ചെയ്തിട്ടുണ്ട്.
ഇമാം അബൂ ഹനീഫ (റ) യുടെ അഭിപ്രായപ്രകാരം അകാരണമായി വൈകിപ്പിച്ചവരും നോറ്റുവീട്ടിയാല്‍ മാത്രം മതി. ഭക്ഷണം നല്‍കേണ്ടതില്ല. സൂറത്തുല്‍ ബഖറയില്‍ റമദാനിലെ നോമ്പ് നഷ്ടപ്പെട്ട ആളുകള്‍ പിന്നീട് നോറ്റുവീട്ടാന്‍ മാത്രമേ കല്പിക്കുന്നുള്ളൂ, ഭക്ഷണം നല്‍കാന്‍ കല്പിക്കുന്നില്ല. എന്നതാണ് അദ്ദേഹം നല്‍കുന്ന വിശദീകരണം. ഇതാണ് ഇമാം ബുഖാരി (റ) യുടെയും അഭിപ്രായം. ഈയടുത്ത് ജീവിച്ച പണ്ഡിതന്മാരില്‍  ഇമാം ശൗക്കാനി (റ) യും ഇബ്നു ഉസൈമീന്‍ (റ) യും ഈ അഭിപ്രായക്കാരാണ്.

ഈ വിഷയത്തില്‍ പണ്ഡിതന്മാരുടെ ചര്‍ച്ച പഠനവിധേയമാക്കിയപ്പോള്‍ എനിക്ക് മനസ്സിലാക്കാന്‍ സാധിച്ചത് ഇപ്രകാരമാണ്:

 വിശുദ്ധ ഖുര്‍ആനില്‍ അല്ലാഹു പറയുന്നത് :

وَمَنْ كَانَ مَرِيضًا أَوْ عَلَى سَفَرٍ فَعِدَّةٌ مِنْ أَيَّامٍ أُخَرَ  البقرة/185.

  "ആരെങ്കിലും രോഗിയാവുകയോ, യാത്രയിലാവുകയോ ചെയ്താല്‍ പകരം അത്രയും എണ്ണം ( നോമ്പെടുക്കേണ്ടതാണ്‌. )" - [അല്‍ബഖറ : 185].

ഇവിടെ ഭക്ഷണം നല്‍കുന്നതിനെ സംബന്ധിച്ച് പ്രതിപാദിക്കുന്നില്ല എന്നത് കൊണ്ട് മാത്രം ഭക്ഷണം നല്‍കേണ്ടതില്ല എന്നതിന് തെളിവാകുന്നില്ല. കാരണം ഇവിടെ പ്രതിപാദിക്കുന്നത് കാരണത്താല്‍ ഉപേക്ഷിക്കുകയോ വൈകിപ്പിക്കുകയോ ചെയ്യുന്ന നോമ്പിനെ സംബന്ധിച്ചാണ്. നമ്മള്‍ ചര്‍ച്ച ചെയ്യുന്നതാകട്ടെ അകാരണമായി വൈകിപ്പിക്കുന്ന നോമ്പിനെ സംബന്ധിച്ചാണ്. അതിനാല്‍ ആയത്തില്‍ പരാമര്‍ശിക്കപ്പെട്ടില്ല എന്നത് പ്രായശ്ചിത്തം ഇല്ല എന്ന് പറയാന്‍ മാത്രം പ്രബലമായ തെളിവല്ല.

എന്നാല്‍ ഇമാം ശൗക്കാനി (റ) ഭക്ഷണം നല്‍കേണ്ടതില്ല എന്നതിന് തെളിവായി പറഞ്ഞത് : الأصل براءة الذمة എന്ന ഉസൂലുല്‍ ഫിഖ്ഹിലെ ഖാഇദയാണ്. അതായത് അടിസ്ഥാനപരമായി കൃത്യമായി ബാധ്യത ഉറപ്പ് വരുത്തുന്ന പ്രമാണം വന്നാലല്ലാതെ ആര്‍ക്കും ഒന്നും ബാധകമല്ല. അകാരണമായി വൈകിപ്പിച്ചവര്‍ നോറ്റുവീട്ടുന്നതോടൊപ്പം ഭക്ഷണം നല്‍കണം എന്നതിന് തെളിവില്ല. സ്വഹാബത്തിന്‍റെ വാക്ക് മാത്രം അതിന് തെളിവല്ല. ഇതാണ് അദ്ദേഹത്തിന്‍റെ സമര്‍ത്ഥനം.

സ്വഹാബത്തിന്‍റെ വാക്കുകള്‍ പ്രമാണമാണോ എന്നത് ഉസൂലിയായ ചര്‍ച്ചയാണ് എങ്കിലും, വഹ്യിന്‍റെ അടിസ്ഥാനത്തിലല്ലാതെ പറയാന്‍ സാധിക്കാത്ത ഒരു വിഷയത്തില്‍ സ്വഹാബത്ത് ഒരു കാര്യം പ്രസ്ഥാവിച്ചാല്‍ അത് അവര്‍ പ്രവാചകന്‍ (സ) യില്‍ നിന്നും കേട്ടതായിരിക്കാനേ വഴിയുള്ളൂ. കാരണം സ്വഹാബത്ത് എല്ലാവരും തന്നെ അഹ്ലുസ്സുന്നയുടെ പക്കല്‍ വിശ്വസ്ഥരാണല്ലോ. അതിനാല്‍ അവര്‍ പറഞ്ഞ കാര്യത്തെ സ്വഹാബത്തില്‍  നിന്നും മറ്റുള്ളവര്‍ എതിര്‍ക്കാത്ത പക്ഷവും അത് വിശുദ്ധഖുര്‍ആനിന്‍റെയോ ഹദീസിന്‍റെയോ പ്രസ്ഥാവനക്ക് പ്രത്യക്ഷത്തില്‍ എതിരാകാത്ത പക്ഷവും അത് നമുക്ക് തെളിവായി സ്വീകരിക്കാം.   

ഇനി ഭക്ഷണം നല്‍കല്‍ ബാധകമല്ല എന്നത് സ്ഥാപിച്ചുകൊണ്ട് ഇബ്നു ഉസൈമീന്‍ (റ) പറയുന്നു : 'സ്വഹാബിമാരുടെ വാക്കുകള്‍ വിശുദ്ധഖുര്‍ആനിലെ പ്രകടമായ ആശയത്തിന് വിയോജിക്കുന്ന രൂപത്തില്‍ വന്നാല്‍ അവരുടെ വാക്ക് പ്രമാണമായി പരിഗണിക്കുകയില്ല. നോറ്റുവീട്ടുന്നതോടൊപ്പം ഭക്ഷണം നല്‍കല്‍ വിശുദ്ധഖുര്‍ആനിലെ പ്രകടമായ ആശയത്തിന് വിപരീതമാണ്. കാരണം അല്ലാഹു മറ്റു ദിവസങ്ങളില്‍ അത് നോറ്റുവീട്ടണം എന്ന് മാത്രമേ കല്‍പിക്കുന്നുള്ളൂ. അതില്‍ കൂടുതല്‍ ഒന്നും കല്പിച്ചിട്ടില്ല. അതുകൊണ്ട് അല്ലാഹു നിര്‍ബന്ധമാക്കിയിട്ടില്ലാത്ത ഒന്നും അല്ലാഹുവിന്‍റെ അടിമകളുടെ മേല്‍ നിര്‍ബന്ധമാക്കുവാന്‍ അല്ലാഹുവിന്‍റെ മുന്നില്‍ നമ്മുടെ ബാധ്യത തീര്‍ക്കുന്ന രൂപത്തിലുള്ള വ്യക്തമായ പ്രമാണമില്ലാതെ നമുക്ക് സാധിക്കില്ല. അബൂ ഹുറൈറ (റ) വില്‍ നിന്നും ഇബ്നു അബ്ബാസ് (റ) വില്‍ നിന്നുമെല്ലാം വന്ന വചനങ്ങള്‍ ഒരാള്‍ നോറ്റു വീട്ടുന്നതിനോടൊപ്പം അഗതിക്ക് ഭക്ഷണം നല്‍കുക കൂടി ചെയ്‌താല്‍ അത് കൂടുതല്‍ ഉചിതമാണ് എന്ന അര്‍ത്ഥത്തില്‍ വന്നതാണ് എന്നാണ് ഞാന്‍ കണക്കാക്കുന്നത്. അത് നിര്‍ബന്ധമാണ്‌ എന്ന അര്‍ത്ഥത്തിലല്ല". - [അശറഹുല്‍ മുംതിഅ്: 6/451].

ഇവിടെ ശൈഖ് ഇബ്നു ഉസൈമീന്‍ (റ) പറഞ്ഞ വിശുദ്ധ ഖുര്‍ആനിന്‍റെ ള്വാഹിറായ കാര്യത്തിന് എതിരായി സ്വഹാബത്തിന്‍റെ വാക്ക് വന്നാല്‍ സ്വഹാബിയുടെ വാക്ക് പ്രമാണമല്ല എന്ന ഉസ്വൂലിയായ അടിസ്ഥാന തത്വത്തെ നാം അംഗീകരിക്കുന്നു. എന്നാല്‍ ഈ വിഷയത്തിലെ സ്വഹാബികളുടെ വാക്ക് വിശുദ്ധ ഖുര്‍ആനിന്‍റെ ള്വാഹിറിന് എതിരല്ല എന്നാണ് മനസ്സിലാക്കാന്‍ സാധിക്കുന്നത്. കാരണം വിശുദ്ധ ഖുര്‍ആനില്‍ പരാമര്‍ശിക്കപ്പെട്ടത് കാരണത്താല്‍ നോമ്പ് ഉപേക്ഷിക്കുകയോ, ഒരു റമദാനില്‍ നിന്ന് മറ്റൊരു റമദാനിലേക്ക് വൈകിപ്പിക്കുകയോ ചെയ്യുന്ന കാര്യത്തെ സംബന്ധിച്ചാണ്. എന്നാല്‍ നമ്മള്‍ ചര്‍ച്ച ചെയ്യുന്നത് അകാരണമായി വൈകിപ്പിക്കുന്നതിനെ സംബന്ധിച്ചാണ്. അതിനാല്‍ സ്വഹാബത്തിന്‍റെ വാക്കുകള്‍ ഈ വിഷയത്തില്‍ വിശുദ്ധ ഖുര്‍ആനിന്‍റെ ള്വാഹിറിന് എതിരല്ല. എന്നാല്‍ 'അവരുടെ വാക്കുകള്‍ നിര്‍ബന്ധമാണ്‌ എന്ന അര്‍ത്ഥത്തിലല്ല മറിച്ച് പുണ്യകരം എന്ന അര്‍ത്ഥത്തിലാണ്' എന്ന അദ്ദേഹത്തിന്‍റെ വിലയിരുത്തല്‍ ഏറെ ചിന്തനീയമാണ് താനും.

ഏതായാലും പൂരിപക്ഷം പണ്ഡിതന്മാരും ഒരു റമദാനിലെ നോറ്റു വീട്ടാനുള്ള  നോമ്പ് മറ്റൊരു റമദാനിന് ശേഷത്തിലേക്ക് വൈകിപ്പിച്ചാല്‍ നോറ്റുവീട്ടുകയും വൈകിപ്പിച്ച ഓരോ ദിവസത്തിനും പരകരമായി ഒരു അഗതിക്ക് ഭക്ഷണം നല്‍കുകയും ചെയ്യണം  എന്ന അഭിപ്രായക്കാരാണ്. സ്വഹാബിമാരുടെ വീക്ഷണവും ഈ അഭിപ്രായത്തിനാണ് പിന്‍ബലം നല്‍കുന്നത്. ഇനി അത് പുണ്യകരമാണോ അതല്ല നിര്‍ബന്ധമാണോ എന്ന് ചര്‍ച്ച ചെയ്യുകയാണ് എങ്കില്‍ തന്നെ, അത് നിറവേറ്റുക എന്നതാണ് സൂക്ഷ്മത എന്ന് പറയേണ്ടതില്ലല്ലോ. "സംശയമുള്ളത് ഒഴിവാക്കി സംശയമില്ലാത്തത് തിരഞ്ഞെടുക്കുക" എന്നത്  ഹുസൈന്‍ (റ) വിന് നബി (സ) പഠിപ്പിച്ച അടിസ്ഥാന്‍ തത്വവുമാണല്ലോ. അനസ് ബിന്‍ മാലിക്ക് (റ) വില്‍ നിന്നും അത് ഉദ്ദരിക്കപ്പെട്ടിട്ടുണ്ട്. അതിനാല്‍ ഒരു റമദാനില്‍ നഷ്ടപ്പെട്ട നോമ്പ് അടുത്ത റമദാന്‍ വന്നെത്തുന്നതിന് മുന്‍പ് നോറ്റുവീട്ടാതെ അകാരണമായി വൈകിപ്പിക്കുന്നവര്‍ നോമ്പ് നോറ്റുവീട്ടുന്നതോടൊപ്പം ഓരോ ദിവസത്തിനും അഗതിക്ക് ഒരു നേരത്തെ ഭക്ഷണം എന്ന നിലക്ക് നല്‍കുകയും ചെയ്യട്ടെ. ഇതാണ് എനിക്ക് മനസ്സിലാക്കാന്‍ സാധിച്ചത് .. അല്ലാഹുവാകുന്നു കൂടുതല്‍ അറിയുന്നവന്‍...

ശൈഖ് ഇബ്നു ബാസ് (റ) യുടെ ഈ വിഷയത്തിലുള്ള ഫത്'വയെ സംബന്ധിച്ച് ഞാന്‍ സൂചിപ്പിച്ചിരുന്നു.

ശൈഖിനോടുള്ള ചോദ്യം: ഏകദേശം അഞ്ചു വര്‍ഷങ്ങള്‍ക്ക് മുന്‍പ് റമളാന്‍ മാസത്തില്‍ എനിക്ക് ശക്തമായ രോഗം ബാധിച്ചു. അതിനാല്‍ തന്നെ ആ മാസം എനിക്ക് നോമ്പ് നോല്‍ക്കാന്‍ സാധിച്ചില്ല. ഇപ്പോഴും ഞാനത് നോറ്റുവീട്ടിയിട്ടില്ല. ഇപ്പോള്‍ എനിക്കത് നോറ്റു വീട്ടാന്‍ പറ്റുമോ ?. അത് വൈകിപ്പിച്ചതിന് എനിക്ക് കുറ്റമുണ്ടോ ?. നിങ്ങള്‍ മറുപടി നല്‍കുമല്ലോ. അല്ലാഹു നിങ്ങള്‍ക്ക് പ്രതിഫലം നല്‍കട്ടെ. 

ഉത്തരം : ഇത്രയധികം വൈകിപ്പിച്ചതിന് നീ അല്ലാഹുവിലേക്ക് തൗബ ചെയ്ത് മടങ്ങുക. യഥാര്‍ത്ഥത്തില്‍ നീ നോമ്പ് ഒഴിവാക്കിയ റമദാന് ശേഷം അടുത്ത റമദാന്‍ വരുന്നതിന് മുന്നോടിയായിത്തന്നെ നീ നിര്‍ബന്ധമായും അത് നോറ്റുവീട്ടണമായിരുന്നു. തൗബ ചെയ്യുകയും (നോമ്പ് നോറ്റുവീട്ടുകയും) ചെയ്യുന്നതോടൊപ്പം വൈകിപ്പിച്ച ഓരോ ദിവസത്തിനും പകരമായി നിന്‍റെ നാട്ടിലെ അടിസ്ഥാന ഭക്ഷണമായ കാരക്കയോ അരിയോ അര സ്വാഅ് അതായത് ഏകദേശം ഒന്നരക്കിലോ അഗതിക്ക് ഭക്ഷണമായി നല്‍കുകയും ചെയ്യണം. ഒരു ദരിദ്രനായാലും ആ ഭക്ഷണം പൂര്‍ണമായും ദാരിദ്രരായവര്‍ക്ക് മാത്രമായിരിക്കണം നല്‍കേണ്ടത്.  അല്ലാഹു നിന്‍റെ തൗബ സ്വീകരിക്കുകയും നമുക്കും നിനക്കും മാപ്പ് തരുകയും ചെയ്യട്ടെ ... അവന്‍ ഉത്തരം നല്‍കുന്നവരില്‍ ഏറ്റവും ഉചിതനാണ്....

[ഈ ഫത്'വയുടെ അറബി ആവശ്യമുള്ളവര്‍ ഇവിടെ ക്ലിക്ക് ചെയ്യുക] 


ഇനി നോറ്റുവീട്ടാതെ ഭക്ഷണം മാത്രം കൊടുക്കുക എന്നുള്ളത് വാര്‍ദ്ധക്യം കാരണത്താല്‍ നോമ്പ് എടുക്കാന്‍ സാധിക്കാത്തവര്‍ക്കും, പൊതുവില്‍ ശമനം പ്രതീക്ഷിക്കാത്ത മാറാ രോഗം കാരണത്താല്‍ നോമ്പെടുക്കാന്‍ സാധിക്കാത്തവര്‍ക്കും മാത്രമുള്ളതാണ്. താല്‍ക്കാലിക രോഗികളോ, ഗര്‍ഭിണികളോ മുലയൂട്ടുന്നസ്ത്രീകളോ അതില്‍ പെടില്ല. അവര്‍ വൈകിയാലും ശരി, നോമ്പ് നോറ്റുവീട്ടണം.

മേല്‍പറഞ്ഞ കാരണങ്ങള്‍ കൊണ്ട് വൈകിയാല്‍ നോറ്റുവീട്ടിയാല്‍ മാത്രം മതി. അകാരണമായാണ് മറ്റൊരു റമദാന്‍ വന്നിട്ടും നോറ്റുവീട്ടാതിരുന്നതെങ്കില്‍, പിന്നീടത് നോറ്റു വീട്ടുകയും ഓരോ ദിവസത്തിനും ഒരഗതിക്ക് ഭക്ഷണം നല്‍കുകയും ചെയ്യണം.

____________

അബ്ദുറഹ്മാൻ അബ്ദുല്ലത്തീഫ് പി. എൻ 

മുലകുടി, ഗര്‍ഭം എന്നിവ കൊണ്ട് നോമ്പ് നഷ്ടപ്പെട്ടാല്‍ എന്ത് ചെയ്യണം ?.

 الحمد لله و الصلاة والسلام على رسول الله ، وعلى آله و صحبه ومن والاه، وبعد؛

മുലയൂട്ടുന്ന സ്ത്രീകളും ഗര്‍ഭിണികളും നോമ്പ് ഉപേക്ഷിക്കുകയും പകരം ഫിദ്'യ കൊടുക്കുകയും ചെയ്‌താല്‍ മതി എന്ന ധാരണ വ്യാപകമായി ആളുകള്‍ക്കിടയില്‍ കാണാന്‍ സാധിക്കുന്നു. മാത്രമല്ല ദിനേന ആളുകള്‍ ഈ സംശയം ആവര്‍ത്തിക്കുകയും ചെയ്യുന്നു അതിനാലാണ് ഈ വിഷയം എഴുതുന്നത്.

www.fiqhussunna.com

നോമ്പ് നോല്‍ക്കുന്നത് കൊണ്ട് തനിക്കോ കുട്ടിക്കോ ദോശമൊന്നുമില്ലെങ്കില്‍  മുലയൂട്ടുന്ന സ്ത്രീക്കും ഗര്‍ഭിണിക്കും നോമ്പ് നോല്‍ക്കല്‍ നിര്‍ബന്ധമാണ്. അകാരണമായി അവര്‍ക്ക് നോമ്പ് ഉപേക്ഷിക്കാന്‍ പാടില്ല.

എന്നാല്‍ ഒരാളെ സംബന്ധിച്ചിടത്തോളം കുഞ്ഞിന്‍റെയോ ഉമ്മയുടെയോ ആരോഗ്യത്തിന് അത് ദോഷകരമായി ബാധിക്കും എന്ന് തത് വിഷയത്തില്‍ വൈദ്യശാസ്ത്രപരമായി അറിവുള്ളവരോ, അല്ലെങ്കില്‍ സ്വയം അനുഭവം കൊണ്ടോ വിലയിരുത്തപ്പെടുകയാണ് എങ്കില്‍ അവര്‍ക്ക് നോമ്പ് ഉപേക്ഷിക്കുകയും പിന്നീട് നോറ്റുവീട്ടുകയും ചെയ്യാവുന്നതാണ്.

അല്ലാഹു പറയുന്നു: 

وَمَنْ كَانَ مَرِيضًا أَوْ عَلَى سَفَرٍ فَعِدَّةٌ مِنْ أَيَّامٍ أُخَرَ  البقرة/185.

  "ആരെങ്കിലും രോഗിയാവുകയോ, യാത്രയിലാവുകയോ ചെയ്താല്‍ പകരം അത്രയും എണ്ണം ( നോമ്പെടുക്കേണ്ടതാണ്‌. )" - [അല്‍ബഖറ : 185].

നോമ്പ് ദോഷകരമായി ബാധിച്ചേക്കാവുന്ന സാഹചര്യത്തില്‍ രോഗികളെപ്പോലെത്തന്നെയാണ് അവരും. അതിനാല്‍ അക്കാരണത്താല്‍ അവര്‍ ഒഴിവാക്കുകയാണ് എങ്കില്‍ അവര്‍ ആ നോമ്പ് പിന്നീട് നിര്‍ബന്ധമായും നോറ്റുവീട്ടണം.

അല്ലാഹു അനുഗ്രഹിക്കട്ടെ ... 

തത് വിഷയത്തിൽ ലജ്നതു ദാഇമയോടുള്ള ചോദ്യവും മറുപടിയും ലഭിക്കാൻ ഈ ലിങ്കിൽ പോകുക: http://www.alifta.net/Fatawa/FatawaSubjects.aspx?languagename=en&View=Page&HajjEntryID=0&HajjEntryName=&RamadanEntryID=0&RamadanEntryName=&NodeID=1028&PageID=3598&SectionID=7&SubjectPageTitlesID=3642&MarkIndex=2&0 

(കൂടുതല്‍ ചോദ്യങ്ങള്‍ നിങ്ങള്‍ക്ക് ബ്ലോഗ്‌ വഴി ചോദിക്കാവുന്നതാണ്. കഴിവിന്‍റെ പരമാവധി ഉത്തരം നല്‍കാന്‍ ശ്രമിക്കും. അല്ലാഹു അനുഗ്രഹിക്കട്ടെ. )

ബേങ്കുകള്‍ക്കും, സിനിമാ സിഡി വില്‍ക്കുന്നവര്‍ക്കും ബില്‍ഡിംഗ് വാടകക്ക് കൊടുക്കാമോ ?.

 الحمد لله و الصلاة والسلام على رسول الله ، وعلى آله و صحبه ومن والاه، وبعد؛

നമ്മുടെ നാട്ടിലുള്ള ബാങ്കുകള്‍ പലിശ ഇടപാട് നടത്തുന്ന ബേങ്കുകളാണ് അതിനാല്‍ തന്നെ അവയുടെ നടത്തിപ്പും നിഷിദ്ധമാണ്. ഇതുപോലെത്തന്നെയാണ് സിനിമാ സി ഡി കളും, മ്യൂസിക് സി ഡി കളുമെല്ലാം. അവയെല്ലാം നിഷിദ്ധമാണ്.

അല്ലാഹു ഒരു കാര്യത്തില്‍ നിന്നും നമ്മെ വിലക്കിയിട്ടുണ്ടെങ്കില്‍ അതുമായി സഹകരിക്കുന്നതും, അതിന് സൗകര്യം ചെയ്ത് കൊടുക്കുന്നതും വിലക്കപ്പെട്ടത് തന്നെയാണ്. മാത്രമല്ല അത്തരം നിഷിദ്ധമായ സ്ഥാപനങ്ങള്‍ നടത്താന്‍ ബില്‍ഡിംഗ് വാടകക്ക് നല്‍കുക വഴി ലഭിക്കുന്ന വാടകയും നിഷിദ്ധമാണ്.

عن بن عباس عن النبي صلى الله عليه و سلم قال : إن الله تعالى إذا حرم شيئا حرم ثمنه

ഇബ്നു അബ്ബാസ് (റ) വില്‍ നിന്നും നിവേദനം: നബി (സ) പറഞ്ഞു: " അല്ലാഹു ഒരു കാര്യം നിഷിദ്ധമാക്കിയാല്‍ അതു മുഖേന ലഭിക്കുന്ന പണവും നിഷിദ്ധമാണ്." - [ത്വബറാനി : 3/7 - ഹദീസ് 20].
അതുകൊണ്ട് തന്നെ  നിഷിദ്ധമായ പലിശ സ്ഥാപനങ്ങള്‍ക്കും, മ്യൂസിക് സ്ഥാപനങ്ങള്‍ക്കും, സിഗരറ്റ് കച്ചവടക്കാര്‍ക്കുമെല്ലാം ബില്‍ഡിംഗ് വാടകക്ക് കൊടുക്കുന്നതും നിഷിദ്ധമാണ്.

ശൈഖ് ഇബ്നു ഉസൈമീന്‍ (റഹിമഹുല്ല) യോട് ചോദിക്കപ്പെട്ട ഒരു ചോദ്യവും അതിന് അദ്ദേഹം നല്‍കിയ ഉത്തരവും ഈ വിഷയത്തില്‍ ശ്രദ്ധേയമാണ്.

ചോദ്യം: മോശമായ വീഡിയോ സി ഡി കള്‍, സിഗരറ്റ്, മ്യൂസിക് തുടങ്ങിയവ വില്‍ക്കുന്നവര്‍ക്കോ, പലിശ ബേങ്കുകള്‍ക്കോ ഷോപ്പുകള്‍ വാടകക്ക് നല്‍കുന്നതിന്‍റെ വിധിയെന്ത്‌ ?.

ഉത്തരം: ഇത്തരം കാര്യങ്ങള്‍ക്ക് ഷോപ്പുകള്‍ വാടകക്ക് നല്‍കുന്നതിന്‍റെ ഇസ്‌ലാമിക വിധി ഈ ആയത്തിലുണ്ട്. അല്ലാഹു പറയുന്നു: 

وَتَعَاوَنُوا عَلَى الْبِرِّ وَالتَّقْوَى وَلَا تَعَاوَنُوا عَلَى الْإِثْمِ وَالْعُدْوَانِ وَاتَّقُوا اللَّهَ إِنَّ اللَّهَ شَدِيدُ الْعِقَاب

"പുണ്യത്തിലും ധര്‍മ്മനിഷ്ഠയിലും നിങ്ങള്‍ അന്യോന്യം സഹായിക്കുക. പാപത്തിലും അതിക്രമത്തിലും നിങ്ങള്‍ അന്യോന്യം സഹായിക്കരുത്‌. നിങ്ങള്‍ അല്ലാഹുവെ സൂക്ഷിക്കുക. തീര്‍ച്ചയായും അല്ലാഹു കഠിനമായി ശിക്ഷിക്കുന്നവനാകുന്നു." - [മാഇദ : 2].

അതിനാല്‍ തന്നെ ചോദ്യത്തില്‍ സൂചിപ്പിച്ച കാര്യങ്ങള്‍ക്ക് ഷോപ്പുകള്‍ വാടകക്ക് നല്‍കല്‍ ഹറാമാണ്. കാരണം അത് പാപത്തിനും അതിക്രമത്തിനും കൂട്ടുനില്‍ക്കലാണ്.  [ഫതാവ അല്‍മര്‍അ : പേജ് 113 , ഇബ്നു ഉസൈമീന്‍ (റ)]. 

അതിനാല്‍ തന്നെ അല്ലാഹുവിലും അന്ത്യദിനത്തിലും വിശ്വസിക്കുന്ന ഒരു വിശ്വാസിയെ സംബന്ധിച്ചിടത്തോളം ഒരിക്കലും അത്തരം കാര്യങ്ങള്‍ക്ക് വാടകക്ക് നല്‍കാന്‍ പാടില്ല. അല്ലാഹുവിന്‍റെ പ്രീതി ആഗ്രഹിച്ചുകൊണ്ട്‌ ഇങ്ങനെയുള്ള ഇടപാടുകളില്‍ നിന്നും മാറി നില്‍ക്കുന്നവര്‍ക്ക് അല്ലാഹു കൂടുതല്‍ ഉചിതവും ഉത്തമവുമായ മറ്റു മാര്‍ഗങ്ങള്‍ തുറന്നുകൊടുക്കും. ഇന്‍ ഷാ അല്ലാഹ് ..

നബി (സ) അരുളി : 

إِنَّكَ لَنْ تَدَعَ شَيْئًا لِلَّهِ عَزَّ وَجَلَّ إِلَّا بَدَّلَكَ اللَّهُ بِهِ مَا هُوَ خَيْرٌ لَكَ مِنْهُ

"നീ അല്ലാഹുവിന് വേണ്ടി ഏതൊരു കാര്യം ഉപേക്ഷിച്ചാലും, അല്ലാഹു അതിനു പകരം അതിനേക്കാള്‍ നല്ലത് നിനക്ക് നല്‍കാതിരിക്കില്ല." - [മുസ്നദ് അഹ്മദ് : 23074].

അല്ലാഹു അനുഗ്രഹിക്കട്ടെ ...

അബ്ദുറഹ്മാൻ അബ്ദുല്ലത്തീഫ് പി. എൻ 

സുന്നത്ത് നമസ്കരിക്കുന്ന ആളുടെ പിന്നില്‍ ഫര്‍ദ് നമസ്കരിക്കാനായി ഒരാള്‍ പിന്തുടര്‍ന്നാല്‍ എന്ത് ചെയ്യും ?.

الحمد لله و الصلاة والسلام على رسول الله ، وعلى آله و صحبه ومن والاه، وبعد؛ 

താന്‍ പിന്തുടര്‍ന്ന് നമസ്കരിക്കുന്ന ആള്‍ ഫര്‍ദ് നമസ്കാരമാണോ സുന്നത്ത് നമസ്കാരമാണോ നമസ്കരിക്കുന്നത് എന്ന് തുടര്‍ന്ന് നമസ്കരിക്കുന്ന ആള്‍ക്ക് അറിയണം എന്ന നിബന്ധനയില്ല. ഇമാമിന്റെയും മഅ്മൂമിന്‍റെയും നിയ്യത്ത് ഒന്നാകേണ്ടതുണ്ടോ  എന്ന വിഷയത്തില്‍ പണ്ഡിതന്മാര്‍ക്കിടയില്‍ അഭിപ്രായഭിന്നത ഉണ്ട് എങ്കിലും നിയ്യത്തുകള്‍ വ്യത്യസ്ഥമാകുന്നത് നമസ്കാരത്തെ ബാധിക്കില്ല എന്നതാണ് പ്രബലമായ അഭിപ്രായം. അതാണ്‌ ഇമാം ശാഫിഇ റഹിമഹുല്ലയുടെയും, ഇമാം അഹ്മദ് റഹിമഹുല്ലയുടെയും അഭിപ്രായവും. 

www.fiqhussunna.com

പ്രമാണം കൊണ്ട് സ്ഥിരപ്പെട്ടതിനാല്‍ തന്നെ  സുന്നത്ത് നമസ്കരിക്കുന്ന ആളുടെ പിന്നില്‍ ഫര്‍ദ് നമസ്കരിക്കുന്ന ആള്‍ക്ക് പിന്തുടര്‍ന്ന് നമസ്കരിക്കാം.

ഉദാ: ദുഹ്‌റിന് ശേഷമുള്ള രണ്ട് റകഅത്ത് സുന്നത്ത് നമസ്കരിക്കുന്ന ഒരാളുടെ പിന്നില്‍ ദുഹറിന്‍റെ നിയ്യത്തോടെ ഒരാള്‍ക്ക് തുടര്‍ന്നു നമസ്കരിക്കാം. അയാള്‍ സലാം വീട്ടിക്കഴിഞ്ഞതിന് ശേഷം ഫര്‍ദ് നമസ്കരിക്കുന്ന ആള്‍ എഴുന്നേറ്റ് രണ്ട് റകഅത്ത് കൂടി പൂര്‍ത്തീകരിച്ച് നമസ്കരിച്ചാല്‍ മതി. 

ഇതിനുള്ള തെളിവാണ് ബുഖാരിയും മുസ്‌ലിമും ഉദ്ദരിച്ച മുആദ് ബ്ന്‍ ജബല്‍ (റ) വിന്‍റെ ഹദീസ്.

عن جابر بن عبد الله رضي الله عنه أن معاذ بن جبل رضي الله عنه كان يصلي مع النبي صلى الله عليه وسلم ثم يأتي قومه فيصلي بهم الصلاة ، فقرأ بهم البقرة ... فقال النبي صلى الله عليه وسلم : ... اقرأ (والشمس وضحاها) و (سبح اسم ربك الأعلى) ونحوها

ജാബിര്‍ (റ) വില്‍ നിന്നും നിവേദനം : "മുആദ് (റ) നബി (സ) യോടൊപ്പം നമസ്കാരം നിര്‍വഹിക്കാറുണ്ടായിരുന്നു. ശേഷം അദ്ദേഹത്തിന്‍റെ പ്രദേശക്കാരുടെ അടുത്തേക്ക് ചെല്ലുകയും അവര്‍ക്ക് ഇമാമായി നിന്നുകൊണ്ട് നമസ്കരിക്കുകയും ചെയ്യും. സൂറത്തുല്‍ ബഖറ പാരായണം ചെയ്തുകൊണ്ടാണ് അദ്ദേഹം അവര്‍ക്ക് ഇമാമായി നമസ്കരിച്ചിരുന്നത്. അപ്പോള്‍ നബി (സ) പറഞ്ഞു: "നീ സൂറത്തു ളുഹയും, സൂറത്തുല്‍ അഅ്'ലയും പോലെയുള്ളവ പാരായണം ചെയ്തുകൊള്ളുക." - [ബുഖാരി 5755, മുസ്‌ലിം 465].

ഈ ഹദീസ് വിശദീകരിച്ചുകൊണ്ട് ഇമാം നവവി റഹിമഹുല്ല പറയുന്നു: "ഫര്‍ദ് നമസ്കരിക്കുന്ന ആള്‍ക്ക് സുന്നത്ത് നമസ്കരിക്കുന്ന ആളുടെ പിന്നില്‍ നിന്നുകൊണ്ട് തുടര്‍ന്ന് നമസ്കരിക്കാം എന്നതിന് ഈ ഹദീസില്‍ തെളിവുണ്ട്. കാരണം മുആദ് (റ) നബി (സ) യോടൊപ്പം നിര്‍വഹിച്ചത് അദ്ദേഹത്തിന്‍റെ ഫര്‍ദ് നമസ്കാരമാണ്. അപ്പോള്‍ അദ്ദേഹത്തിന്‍റെ ഫര്‍ദ് നമസ്കാരം വീടി. പിന്നീട് തന്‍റെ പ്രദേശക്കാര്‍ക്ക് ഇമാമായി നമസ്കരിക്കുമ്പോള്‍ അത് അദ്ദേഹത്തിന് സുന്നത്തും അവര്‍ക്ക് ഫര്‍ദുമാണ്." - [ശറഹു മുസ്‌ലിം : 4/181].

മാത്രമല്ല ഒറ്റക്ക് നമസ്കാരം ആരംഭിച്ച ഒരാളുടെ പിന്നില്‍ മറ്റൊരാള്‍ക്ക് തുടര്‍ന്ന് നമസ്കരിക്കാം.

ലജ്‌നതുദ്ദാഇമയോട് ചോദിക്കപ്പെട്ടു: 

ചോദ്യം: നമസ്കരിക്കാനായി ഒറ്റക്ക് കൈകെട്ടിയ ഒരാളുടെ പിന്നില്‍ പിന്തുടര്‍ന്നുകൊണ്ട് നമസ്കരിക്കാമോ ?.

ഉത്തരം: അതെ, അത് അനുവദനീയമാണ്. ഇബ്നു അബ്ബാസില്‍ നിന്നും സ്ഥിരപ്പെട്ടുവന്ന ഈ ഹദീസ് അതിന് തെളിവാണ്: 

عن ابن عباس رضي الله عنهما قال : بِتُّ عند خالتي فقام النَّبي صلَّى الله عليه وسلم يصلِّي مِن الليل فقمتُ أصلِّي معه فقمتُ عن يساره فأخذ برأسي فأقامني عن يمينه .

ഇബ്നു അബ്ബാസ് (റ) പറഞ്ഞു: "ഞാന്‍ എന്‍റെ മാതൃസഹോദരിയുടെ അടുക്കല്‍ അന്തിയുറങ്ങി. അപ്പോള്‍ നബി (സ) എഴുന്നേറ്റ് രാത്രി നമസ്കാരം നിര്‍വഹിക്കാന്‍ തുടങ്ങി. ഞാനും എഴുന്നേറ്റ് അദ്ദേഹത്തോടൊപ്പം നമസ്കരിക്കാന്‍ തുടങ്ങി. അദ്ദേഹത്തിന്‍റെ ഇടതുവശത്താണ് ഞാന്‍ നിന്നിരുന്നത്. അപ്പോള്‍ എന്‍റെ തലയില്‍ പിടിച്ച് അദ്ദേഹം എന്നെ വലതു ഭാഗത്തേക്ക് നിര്‍ത്തി." - [ബുഖാരി 667, മുസ്‌ലിം 763]. അടിസ്ഥാനപരമായി ഈ വിഷയത്തില്‍ സുന്നത്ത് നമസ്കാരവും, ഫര്‍ദ് നമസ്കാരവും തമ്മില്‍ വ്യത്യാസമില്ല.  - [ഫതാവ ഇസ്ലാമിയ്യ, ലജ്‌നതുദ്ദാഇമ 1/178].

അഥവാ ഫര്‍ദ് നമസ്കാരമായാലും സുന്നത്ത് നമസ്കാരമായാലും ഒറ്റക്ക് നമസ്കരിക്കുന്ന ഒരാളുടെ പിന്നില്‍ മറ്റൊരാള്‍ക്ക് പിന്തുടരാം. ഇത് സുന്നത്ത് നമസ്കാരങ്ങളില്‍ മാത്രമാണ് എന്ന് ചില പണ്ഡിതന്മാര്‍ അഭിപ്രായപ്പെട്ടു കാണാം. എന്നാല്‍ പ്രബലമായ അഭിപ്രായം ഇത് ഫര്‍ദിനും സുന്നത്തിനും ഒരുപോലെ അനുവദനീയമാണ് എന്നതാണ്. ശൈഖുല്‍ ഇസ്‌ലാം ഇബ്നു തൈമിയ (റഹിമഹുല്ല) പറയുന്നു : 

"والصحيح جواز ذلك في الفرض والنفل"

"ശരിയായ അഭിപ്രായം അത് ഫര്‍ദിലും സുന്നത്തിലും അനുവദനീയമാണ് എന്നതാണ്." - [മജ്മൂഉ ഫതാവ : 22/258]. 

പലപ്പോഴും സുന്നത്ത് നമസ്കാരത്തില്‍ ഏര്‍പ്പെട്ടിരിക്കുന്ന ഒരു സാധാരണക്കാരന്‍റെ പിന്നില്‍ വന്ന് ആരെങ്കിലും പിന്തുടര്‍ന്നാല്‍ ചിലപ്പോള്‍ അവര്‍ സുജൂദിലും റുകൂഇലും ഒക്കെ പോകുമ്പോള്‍ ശബ്ദം തീരെ ഉയര്‍ത്താതിരിക്കുന്നത് കാണാം. പിന്നില്‍ തുടരുന്ന ആള്‍ ഏറെ പ്രയാസപ്പെടുകയും ചെയ്യും. എന്നാല്‍ സുന്നത്ത് നമസ്കരിക്കുന്ന തന്നെ മറ്റൊരാള്‍ക്ക് പിന്തുടരാന്‍ പാടില്ല എന്ന ധാരണ കാരണത്താലായിരിക്കാം ഒരുപക്ഷേ അയാള്‍ ശബ്ദം ഉയര്‍ത്താത്തത്. ചിലപ്പോള്‍ ചിലര്‍ കൈകൊണ്ട് താന്‍ ഫര്‍ദല്ല നമസ്കരിക്കുന്നത് എന്ന് ആംഗ്യം കാണിക്കുന്നത് പോലും കാണാം. എന്നാല്‍ യഥാര്‍ത്ഥത്തില്‍ സുന്നത്ത് നിര്‍വഹിക്കുന്ന ഒരാളുടെ പിന്നില്‍ മറ്റൊരാള്‍ പിന്തുടര്‍ന്നാല്‍, പിന്തുടര്‍ന്ന ആളെ കേള്‍പിക്കുന്ന രൂപത്തില്‍ ഉച്ചത്തില്‍ തക്ബീര്‍ ചൊല്ലണം. സുന്നത്ത് നമസ്കരിക്കുന്ന ആളുടെ പിന്നില്‍ ഫര്‍ദ് നമസ്കരിക്കുന്ന ആള്‍ക്ക് പിന്തുടര്‍ന്ന് നമസ്കരിക്കാം എന്ന് നേരത്തെ നാം തെളിവ് സാഹിതം വിശദീകരിച്ചുവല്ലോ. അതിനാല്‍ തന്നെ ആരെങ്കിലും തന്‍റെ പിന്നില്‍ പിന്തുടര്‍ന്നാല്‍ തക്ബീര്‍ അയാളെ കേള്പിക്കും വിധം ഉരുവിടുക. രണ്ട് റക്അത്ത് നിര്‍വഹിച്ച് താന്‍ സലാം വീട്ടിയാല്‍ പിന്തുടര്‍ന്ന ആള്‍ എഴുന്നേറ്റ് ബാക്കി പൂര്‍ത്തീകരിക്കേണ്ടതാണ്.

അല്ലാഹുവാണ് കൂടുതല്‍ അറിയുന്നവന്‍.. അവന്‍ അനുഗ്രഹിക്കട്ടെ ....

By. അബ്ദുറഹ്മാൻ അബ്ദുല്ലത്തീഫ് പി. എൻ

കച്ചവടം ഒരു കര്‍മശാസ്ത്ര പഠനം - part 2. [ മതവിധി , നിബന്ധനകള്‍].

കച്ചവടം - ഒരു കര്‍മശാസ്ത്ര പഠനം (Part 2)
================================
നമ്മള്‍ part 1 ല്‍ മനസ്സിലാക്കിയതിന്റെ തുടര്‍ച്ചയാണ് ഇവിടെ കുറിക്കുവാന്‍ പോവുന്നത്.

ഒരു കച്ചവടത്തിന്റെ ഹുക്മിനെക്കുറിച്ചും അത് സംബന്ധമായ വിശുദ്ധ ഖുര്‍ആനിന്റെ പരാമര്‍ശത്തെ പറ്റിയും, ഒരു കച്ചവടം ഇസ്‌ലാമികം ആവണമെങ്കില്‍ പാലിക്കേണ്ടേ നിബന്ധനകളെക്കുറിച്ചുമാണ്  ഇവിടെ വിശദീകരിക്കപ്പെടുന്നത് .. ഇന്‍ ഷാ അല്ലാഹ് ..

കച്ചവടത്തിന്റെ മതവിധി :


വിധി : അനുവദനീയം.

വിശുദ്ധ ഖുര്‍ആന്‍ വളരെ കൃത്യമായി കച്ചവടത്തിന്റെ മതവിധിയെക്കുറിച്ച് പഠിപ്പിക്കുന്നുണ്ട്.അല്ലാഹു പറയുന്നു :

وَأَحَلَّ اللَّـهُ الْبَيْعَ وَحَرَّمَ الرِّبَا

"എന്നാല്‍ കച്ചവടം അല്ലാഹു അനുവദിക്കുകയും പലിശ നിഷിദ്ധമാക്കുകയുമാണ് ചെയ്തിട്ടുള്ളത്‌ ".  [ سورة البقرة:275].

അല്ലാഹുവും റസൂലും വിരോധിച്ചത് ഒഴികെയുള്ള എല്ലാ കച്ചവടവും അനുവദനീയമാണ്. അഥവാ വിരോധങ്ങള്‍ കടന്നുവരാത്ത പക്ഷം അടിസ്ഥാനപരമായി മനുഷ്യന്റെ ഇടപാടുകളെല്ലാം അനുവദനീയമാണ്.

അതിനാല്‍ത്തന്നെ സ്വാഭാവികമായും ഓരോ രൂപത്തിലുള്ള കച്ചവടങ്ങള്‍ക്കും അവ  അനുവദനീയമാണ് എന്ന് പ്രസ്താവിക്കുന്ന പ്രത്യേക തെളിവ് ആവശ്യമില്ല. കാരണം അടിസ്ഥാനപരമായി കച്ചവടങ്ങള്‍ എല്ലാം അനുവദനീയമാണ് എന്ന് നാം പറഞ്ഞുവല്ലോ. എന്നാല്‍ ഒരു കച്ചവടം നിഷിദ്ധമാണ് എന്ന് പറയാന്‍ വ്യക്തമായ തെളിവ് ആവശ്യമാണ്‌താനും.

ഇവിടെ മുആമലാത്തുകള്‍ (കച്ചവടം അടക്കമുള്ള ഇടപാടുകള്‍) ആരാധനകളില്‍ നിന്നും തികച്ചും വ്യത്യസ്തമാണ്എന്ന് മനസ്സിലാക്കാം.  ആരാധനകളില്‍ അവ ചെയ്യാന്‍ തെളിവ് ആവശ്യമാണ്‌ എങ്കില്‍, കച്ചവടകാര്യങ്ങളില്‍ ഒരുകാര്യം വിരോധിക്കുവാനാണ് തെളിവ് വേണ്ടത് എന്നര്‍ത്ഥം.

ഉദാ : ഒരാള്‍ അയാളുടെ സ്വന്തം ചിന്തയില്‍ നിന്നും ഒരു ആരാധനയുണ്ടാക്കിയാല്‍ അത് ബിദ്അത്താണ്.

مَنْ عَمِلَ عَمَلاً ليسَ عليه أمرُنا هذا فهو رَدٌّ

"അല്ലാഹുവിന്റെ റസൂലിന്റെ കല്‍പ്പന ഇല്ലാത്ത ഒരു കര്‍മ്മം ഈ ദീനിന്റെ പേരില്‍ ആരെങ്കിലും പുതുതായി ഉണ്ടാക്കിക്കിയിട്ടുണ്ടെങ്കില്‍ അത് മടക്കപ്പെടുന്നതാണ് (അവനിലേക്ക് ശിക്ഷയായി മടങ്ങുന്നതാണ)".-

ആഇശ (റ) ഉദ്ദരിച്ച പ്രസിദ്ധമായ ഹദീസാണിത്. മതത്തില്‍ പുത്തന്‍ ആചാരങ്ങള്‍ ഉണ്ടാക്കി ഇസ്‌ലാമിന്റെ അടിസ്ഥാന ആശയാദര്‍ശങ്ങള്‍ക്ക് കത്തിവെക്കുന്ന ബിദ്ഈ കക്ഷികള്‍ക്ക് ശക്തമായ താക്കീതാണ് ഈ ഹദീസ്.  ആരാധനകളില്‍ പ്രമാണങ്ങളുടെ പിന്‍ബലം ഇല്ലാത്ത കര്‍മ്മങ്ങള്‍ നിശ്ഫലമാണ് എന്ന് ഈ ഹദീസ് സൂചിപ്പിക്കുന്നു. അപ്പോള്‍ ആരാധനയുടെ വിഷയത്തില്‍ അല്ലാഹുവും റസൂലും കല്‍പിച്ചത്‌ ഒഴികെ എല്ലാം നിഷിദ്ധമാണ് എന്ന് നാം മനസ്സിലാക്കി .

എന്നാല്‍ ഭക്ഷണത്തിന്റെയും കച്ചവടത്തിന്റെയും വിഷയത്തില്‍ അല്ലാഹുവും റസൂലും വിരോധിച്ചത് ഒഴികെ എല്ലാം അനുവദനീയമാണ്. വിരോധിക്കപ്പെട്ടു എന്നതിനാണ് തെളിവ് വേണ്ടത്.  ഉദാ: ഒരാള്‍ കമ്പി കച്ചവടം ചെയ്യുന്നു. അവിടെ കമ്പി കച്ചവടം ചെയ്യല്‍ അനുവദനീയമാണ്  എന്ന് പ്രസ്താവിക്കുന്ന പ്രത്യേക തെളിവ് ആവശ്യമില്ല. മറിച്ച് കച്ചവടം അനുവദനീയമാണ് എന്ന വിശുദ്ധഖുര്‍ആനിന്റെ പൊതു പ്രഖ്യാപനത്തില്‍ അത് പെടുന്നു. എന്നാല്‍ ഒരാള്‍ സിഗരറ്റ് ആണ് വില്‍ക്കുന്നത് എങ്കില്‍ അത് നിഷിദ്ധമാണ് എന്ന് നമ്മള്‍ പറയുന്നു. സ്വാഭാവികമായും അതിന് എന്താണ് തെളിവ് എന്ന് ഒരാള്‍ക്ക് ചോദിക്കാം. കാരണം മുആമാലാത്തുകളില്‍  നിഷിദ്ധമാണ് എന്നതിനാണല്ലോ തെളിവ് വേണ്ടത്. അത് നിഷിദ്ധമാണ് എന്നതിനുള്ള തെളിവുകളാണ്:

1- അല്ലാഹു പറയുന്നു:

وَلَا تُلْقُوا بِأَيْدِيكُمْ إِلَى التَّهْلُكَةِ وَأَحْسِنُوا إِنَّ اللَّهَ يُحِبُّ الْمُحْسِنِينَ

"നിങ്ങളുടെ കൈകളാല്‍ നിങ്ങള്‍ തന്നെ (സ്വയം) നാശത്തിലേക്ക് തള്ളി വിടരുത്. നിങ്ങള്‍ നല്ലത്‌ പ്രവര്‍ത്തിക്കുക. നന്‍മ ചെയ്യുന്നവരെ അല്ലാഹു ഇഷ്ടപെടുക തന്നെ ചെയ്യും." - [അല്‍ബഖറ:195]. അല്ലാഹുവിന്റെ മാര്‍ഗത്തിലുള്ള ധര്‍മ്മസമരം മറന്ന്, തന്റെ ഭൗതിക സുഖങ്ങളും കച്ചവടവും മാത്രം മുന്നില്‍ക്കണ്ട് സ്വയം നശിക്കരുത് എന്നത് സൂചിപ്പിച്ചുകൊണ്ടാണ് ഈ ആയത്ത് ഇറങ്ങിയത് എങ്കിലും, സ്വയം നാശം വരുത്തി വെക്കുന്ന ഏത് പ്രവര്‍ത്തിയും നിഷിദ്ധമാണ് എന്നതിനും, അല്ലാഹുവിന്റെ നിയമങ്ങള്‍ മറന്ന് ഭൗതിക സുഖങ്ങള്‍ മാത്രം ലക്ഷ്യം വച്ച് ജീവിക്കരുത് എന്നതിനും ഈ ആയത്ത് തെളിവാണ്. അതുകൊണ്ട് തന്നെ മനുഷ്യനെ സ്വയം നശിപ്പിക്കുകയും, അവന്റെ സമ്പത്ത് അന്യായമായി ചിലവഴിക്കാന്‍ ഇടവരുത്തുകയും ചെയ്യുന്ന സിഗരറ്റ് നിഷിദ്ധമാണ് എന്ന് ഈ ആയത്തില്‍ നിന്നും മനസ്സിലാക്കാം. "നിങ്ങളുടെ കൈകളാല്‍ നിങ്ങള്‍ തന്നെ (സ്വയം) നാശത്തിലേക്ക് തള്ളി വിടരുത്".വ്യക്തമായും മനുഷ്യ ശരീരത്തിന് ദോഷകരമായി ഭവിക്കുന്ന ഏത് വസ്തുക്കളുടെ ഉപയോഗവും നിഷിദ്ധമാണ് എന്ന് ഇതില്‍ നിന്നും മനസ്സിലാക്കാം.

2 - അബൂ സഈദ് അല്‍ഖുദരി (റ) നിവേദനം: റസൂലുല്ല (സ) പറഞ്ഞു:

لا ضرر ولا ضرار

"നിങ്ങള്‍ സ്വയം ഉപദ്രവിക്കുകയോ, മറ്റുള്ളവര്‍ക്ക് ഉപദ്രവം ഉണ്ടാക്കുകയോ ചെയ്യരുത്". - [ഇബ്നുമാജ - ഹദീസ് ഹസന്‍]. സിഗരറ്റില്‍ സ്വയം ഉപദ്രവിക്കലും മറ്റുള്ളവര്‍ക്ക് ഉപദ്രവം ചെയ്യലും, രണ്ടും അടങ്ങിയിട്ടുണ്ട്. അതിനാല്‍ തന്നെ അത് നിഷിദ്ധമാണ് .

ഒരു വസ്തുവിന്റെ ഉപയോഗം നിഷിദ്ധമാണ് എങ്കില്‍ അത്  കച്ചവടം ചെയ്യലും നിഷിദ്ധമാണ്. ഇബ്നു അബ്ബാസ് (റ) വില്‍ നിന്നും നിവേദനം. അല്ലാഹുവിന്റെ റസൂല്‍ (സ) പറഞ്ഞു:

إِنَّ اللَّهَ إِذَا حَرَّمَ عَلَى قَوْمٍ أَكْلَ شَيْءٍ حَرَّمَ عَلَيْهِمْ ثَمَنَهُ

"അല്ലാഹു ആരുടെയെങ്കിലും മേല്‍ ഒരു വസ്തു ഭക്ഷിക്കുന്നത് നിഷിദ്ധമാക്കിയാല്‍ അതുമുഖേന അവന് ലഭിക്കുന്ന വരുമാനവും നിഷിദ്ധമാണ്" [അല്‍ബാനി - സ്വഹീഹ്, സ്വഹീഹുല്‍ ജാമിഅ് : 5107]. ഈ ഹദീസ് വിശദീകരിച്ചുകൊണ്ട് ഇമാം ഹാഫിദ് ഇബ്നു ഹജര്‍ അല്‍ഹംബലി (റഹി) പറയുന്നു : "മേല്‍ പറഞ്ഞ ഹദീസില്‍ നിന്നും വളരെ വ്യക്തമാണ് ഉപയോഗിക്കല്‍ നിഷിദ്ധമായ വസ്തു വിറ്റ്‌ ലഭിക്കുന്ന പണവും നിഷിദ്ധമാണ് എന്നുള്ളത്. നിഷിദ്ധമായ ഉപയോഗങ്ങളുള്ള സര്‍വ വസ്തുക്കള്‍ക്കും അത് ബാധകമാണ് എന്ന് മനസ്സിലാക്കാവുന്ന പ്രയോഗമാണ് ഹദീസില്‍ വന്നിട്ടുള്ളത്." [ജാമിഉല്‍ ഉലൂമി വല്‍ ഹികം : 415]. ചില ഹദീസുകളില്‍ ഭക്ഷ്യ വസ്തു എന്ന് പരാമര്‍ശിക്കാതെ "അല്ലാഹു ആരുടെയെങ്കിലും മേല്‍ വല്ലതും നിഷിദ്ധമാക്കിയാല്‍" എന്നു തന്നെ പ്രയോഗിചിട്ടുള്ളതായി കാണാം.

മുകളില്‍ നാം ഉദ്ദരിച്ച തെളിവുകളില്‍ നിന്നും സിഗരറ്റ് ഉപയോഗിക്കുന്നതും, വാങ്ങുന്നതും, വില്‍ക്കുന്നതും, സിഗരറ്റ് കമ്പനിക്ക് തന്റെ ബില്‍ഡിംഗ് വാടകക്ക് കൊടുക്കുന്നതും എല്ലാം നിഷിദ്ധമാണ് എന്ന് മനസ്സിലാക്കാം. ഇപ്രകാരം മുആമലാത്തുകളുമായി ബന്ധപ്പെട്ട ഒരു കാര്യം നിഷിദ്ധമാണ് എന്ന് പറയണമെങ്കില്‍ അതിന് തെളിവ് ഉദ്ദരിക്കണം എന്നര്‍ത്ഥം. നേരിട്ടോ, സൂചനകള്‍ മുഖേനയോ, ശറഅ് പഠിപ്പിക്കുന്ന അടിസ്ഥാന തത്വങ്ങള്‍ മുന്‍നിര്‍ത്തിയോ അതിന്‍റെ വിധി പറയുക എന്നുള്ളത് പണ്ഡിതന്മാരുടെ കര്‍ത്തവ്യമാണ്.

മുകളിലെ വിശദീകരണത്തില്‍ നിന്നും നാം പഠിക്കേണ്ട കര്‍മ്മശാസ്ത്രത്തിലെ രണ്ട് അടിസ്ഥാന തത്വങ്ങള്‍:

1- الأصل في العبادات المنع  ആരാധനകള്‍ അടിസ്ഥാനപരമായി നിഷിദ്ധമാണ്. (പ്രമാണങ്ങളുടെ അടിസ്ഥാനത്തിലല്ലാതെ ഒരാരാധനയും അനുഷ്ടിക്കല്‍ അനുവടനീയമാകുന്നില്ല).

2- الأصل في المعاملات الإباحة മനുഷ്യന്റെ പരസ്പരമുള്ള ഇടപാടുകള്‍ അടിസ്ഥാനപരമായി അനുവദനീയമാണ്. (അതില്‍ ഏതെങ്കിലും ഇടപാട് നിഷിദ്ധമാകണം എന്നുണ്ടെങ്കില് അതിന് തെളിവ് വേണം).


ഇനി കച്ചവടത്തിന്‍റെ അടിസ്ഥാനപരമായ വിധി എന്നത് അനുവദനീയം എന്നതാണ് എങ്കിലും ഒരാളുടെ ഉദ്ദേശങ്ങള്‍ക്കും സാഹചര്യങ്ങള്‍ക്കും അനുസരിച്ച് പുണ്യകരം, നിര്‍ബന്ധം, വെറുക്കപ്പെട്ടത്, നിഷിദ്ധം എന്നിങ്ങനെ അതിന്‍റെ നിയമങ്ങള്‍ മാറാം. 

പുണ്യകരമായ കാര്യങ്ങള്‍ക്ക് ആ കച്ചവടം ഹേതുവാകുമ്പോള്‍ അത് പുണ്യകരമാകുന്നു. ഉദാ:  ആളുകള്‍ക്ക് അവരുടെ ആവശ്യങ്ങള്‍ നിറവേറ്റാനും, പാവപ്പെട്ടവരെ സഹായിക്കാനുമൊക്കെ തന്റെ കച്ചവടം നിമിത്തമാകുമ്പോള്‍ അത് പുണ്യകരമാകുന്നു. മാത്രമല്ല തന്റെ കച്ചവടം ഹലാലായിരിക്കണം അഥവാ അല്ലാഹുവിന്റെ തൃപ്തി ലഭിക്കുന്ന കച്ചവടമായിരിക്കണം എന്ന ചിന്ത ഒരാള്‍ക്ക് ഉണ്ടെങ്കില്‍ തന്നെ അത് പുണ്യകരമാകും. കാരണം റസൂലുല്ല പറഞ്ഞു :
"ഒരാള്‍ തന്റെ ഭാര്യയുമായി ലൈംഗിക വികാരത്തില്‍ ഏര്‍പ്പെടുന്നതില്‍ പോലും പുണ്യമുണ്ട്". അപ്പോള്‍ സ്വഹാബത്ത് ചോദിച്ചു : ഞങ്ങള്‍ ഞങ്ങളുടെ വികാരം ശമിപ്പിക്കുന്നതില്‍ പോലും പുണ്യമോ ?!. മഹാനായ റസൂലുല്ല നല്‍കിയ മറുപടി: "നിങ്ങള്‍ അത് ഹറാമായ ബന്ധത്തിലൂടെ ചെയ്തിരുന്നുവെങ്കില്‍ നിങ്ങള്‍ക്ക് ശിക്ഷ ഉണ്ടാകുമായിരുന്നില്ലേ, എങ്കില്‍ ഹലാലായ മാര്‍ഗത്തില്‍ അത് നിര്‍വഹിക്കുമ്പോള്‍ അതിന് നിങ്ങള്‍ക്ക് പുണ്യവുമുണ്ട്". അപ്പോള്‍ ഹലാലായ കച്ചവടമായിരിക്കണം എന്നാഗ്രഹിക്കുകയും അതിന് പരിശ്രമിക്കുകയും ചെയ്യുന്നവന് പുണ്യമുണ്ട് എന്നര്‍ത്ഥം.

നിര്‍ബന്ധമായ കാര്യങ്ങള്‍ ആ കച്ചവടം മുഖേനയല്ലാതെ നിറവേറ്റപ്പെടുകയില്ല എങ്കില്‍ അവിടെ കച്ചവടം നിര്‍ബന്ധമാകുന്നു. ഉദാ: ഒരാള്‍ക്ക് തന്റെ ഭാര്യക്കും മക്കള്‍ക്കും ചിലവിന് കൊടുക്കല്‍ നിര്‍ബന്ധമാണല്ലോ. അതയാള്‍ കണ്ടെത്തുന്നത് കച്ചവടത്തിലൂടെയാണ്. മറ്റു മാര്‍ഗങ്ങള്‍ അദ്ദേഹത്തിന് വശമില്ലാത്ത പക്ഷം അവിടെ കച്ചവടം എന്നുള്ളത് അദ്ദേഹത്തിന് നിര്‍ബന്ധമായിത്തീരും. കാരണം അത് ചെയ്യാത്ത പക്ഷം ചിലവിന് കൊടുക്കുക എന്ന നിര്‍ബന്ധ ബാധ്യത നിറവേറ്റാന്‍ സാധിക്കുകയില്ല. 

ഇനിവെറുക്കപ്പെട്ട കാര്യത്തിലേക്ക് വഴിവെക്കുന്ന കച്ചവടമാണ് എങ്കില്‍ അത് വെറുക്കപ്പെട്ടതും ഹറാമായ കാര്യത്തിലേക്ക് വഴിവെക്കുന്നതാണ് എങ്കില്‍ അത് നിഷിദ്ധവും ആയിരിക്കും.




 شروط صحة البيع: (കച്ചവടം സാധുവാകാനുള്ള നിബന്ധനകള്‍)

1- التراضي من البائع والمشتري إلا من أُكره بحق
(വില്‍ക്കുന്നവനും വാങ്ങിക്കുന്നവനും പരസ്പരം തൃപ്തരാവണം). ഇത് ഒരു കച്ചവടം ശരിയായ കച്ചവടമായി പരിഗണിക്കുവാനുള്ള നിബന്ധനയാണ്.

എന്നാല്‍ ചിലപ്പോള്‍ ചില സന്ദര്‍ഭങ്ങളില്‍, ന്യായമായ കാരണങ്ങള്‍ കൊണ്ട് വില്‍ക്കുവാന്‍ നിര്‍ബന്ധിക്കപ്പെടുന്ന അവസ്ഥകളില്‍ തൃപ്തിയുടെ ആവശ്യമില്ല.

ഉദാ : مهجور عليه
ഒരാളുടെ കടബാധ്യത അയാളുടെ സ്വത്തിനേക്കാള്‍/വരുമാനത്തെക്കാള്‍ കവിഞ്ഞാല്‍ ആ സന്ദര്‍ഭത്തില്‍ കോടതി കടം ലഭിക്കാനുള്ളവരുടെ അവകാശങ്ങള്‍ പരിഗണിച്ച് സാമ്പത്തിക ക്രയവിക്രയങ്ങള്‍ നടത്തുന്നതില്‍ നിന്ന് അയാളെ തടയും. ഒരുപക്ഷേ, കോടതി അയാളുടെ കൈവശമുള്ള  വസ്തുക്കള്‍ വിറ്റ് കടബാധ്യത തീര്‍ക്കാന്‍ വേണ്ടി അയാളെ നിര്‍ബന്ധിക്കും. അത്തരം ഒരു സന്ദര്‍ഭത്തില്‍ അയാളുടെ തൃപ്തി ആവശ്യമായി വരുന്നില്ല. കാരണം അവിടെ അയാളുടെ അടിസ്ഥാന ആവശ്യങ്ങള്‍ കഴിച്ച് ബാക്കിയുള്ളവ വില്‍ക്കുന്നത് മറ്റുള്ളവരുടെ അവകാശങ്ങളെ സംരക്ഷിക്കാന്‍ വേണ്ടിയാണ്. അതിനാല്‍ തന്നെ അവിടെ ഇസ്‌ലാമിക കോടതിക്ക് അയാള്‍ ത്രിപ്തിപ്പെട്ടില്ലെങ്കിലും വസ്തുക്കള്‍ വില്‍ക്കാന്‍ അയാളെ നിര്‍ബന്ധിക്കാനുള്ള അധികാരമുണ്ട്‌.

2- أن يكون العاقد جائز التصرف بأن يكون كل منهما حراً، مكلفاً، رشيداً
(കരാറില്‍ ഏര്‍പ്പെടുന്നവര്‍ സാമ്പത്തിക ക്രയവിക്രയങ്ങള്‍ നടത്താന്‍ ഇസ്ലാമികമായി അനുവാദം ഉള്ളവര്‍ ആയിരിക്കണം.)

അഥവാ: സ്വന്തന്ത്രനും,  ബുദ്ധിയും പ്രായപൂര്‍ത്തിയും എത്തിയവനും, സാമ്പത്തിക ക്രയവിക്രയങ്ങളെപ്പറ്റിയും ലാഭനഷ്ടങ്ങളെക്കുറിച്ചും  അവബോധമുള്ളവനും ആയിരിക്കണം.

എന്നാല്‍ ലാഭനഷ്ടങ്ങള്‍ തിരിച്ചറിയാനുള്ള പക്വതയെത്തിയ കുട്ടികള്‍ക്ക് പ്രായപൂര്‍ത്തി എത്തിയിട്ടില്ലെങ്കില്‍ പോലും തങ്ങളുടെ രക്ഷാധികാരികളുടെ  അനുമതിയോടെ കച്ചവടം നടത്താം.

3- أن يكون المبيع مما يباح الانتفاع به مطلقاً
(വില്‍ക്കപ്പെടുന്ന വസ്തു നിര്‍ബന്ധസാഹചര്യത്തിലല്ലാതെത്തന്നെ  അനുവദനീയമായ ഉപയോഗമുള്ള വസ്തുവായിരിക്കണം)

അതായത് ഹലാലായ വസ്തു ആയിരിക്കണം എന്ന് ചുരുക്കം.

ഉദാ : ശവം വില്‍ക്കാന്‍ പാടില്ല. പക്ഷെ ചില നിര്‍ബന്ധ സാഹചര്യത്തില്‍
ഒരു ഭക്ഷണവും കിട്ടാതെ വരുന്ന സന്ദര്‍ഭത്തില്‍, നിര്‍ബന്ധിത സാഹചര്യം പരിഗണിച്ച് ജീവന്‍ നിലനിര്‍ത്താന്‍ വേണ്ടി ശവത്തില്‍ നിന്ന് ഭക്ഷിക്കാം എന്ന് ഇസ്‌ലാം അനുവദിക്കുന്നുണ്ട്. എന്നാല്‍ അത്തരം നിര്‍ബന്ധിത സാഹചര്യത്തില്‍ മാത്രം അനുവദനീയമാകുക എന്നത് ആ വസ്തു കച്ചവടം ചെയുന്നത് അനുവദനീയമാക്കുന്നില്ല.വില്‍ക്കല്‍ അനുവദനീയമായ വസ്തു നിര്‍ബന്ധിത സാഹചര്യത്തിലല്ലെങ്കില്‍ പോലും അനുവദനീയമായ വസ്തു ആയിരിക്കണം. കാരണം ഏത് നിഷിദ്ധമായ വസ്തുവും ഒരുപക്ഷേ ജീവന്‍ അപകടപ്പെടുന്ന സാഹചര്യത്തില്‍ അനുവദനീയമായേക്കാമല്ലോ. അതുകൊണ്ട് അത് പരിഗണിക്കില്ല. 

അല്ലാഹുവും റസൂലും വിലക്കിയിട്ടുള്ള വസ്തുക്കള്‍ ഒന്നും തന്നെ കച്ചവടം ചെയ്യാന്‍ പാടില്ല. ചില വസ്തുക്കളെ നിര്‍ബന്ധ സാഹചര്യത്തില്‍ അല്ലാതെത്തന്നെ ഉപയോഗപ്പെടുത്തുന്നത് അനുവദനീയമാക്കിയിട്ടുണ്ടെങ്കില്‍ അവ കച്ചവടം ചെയ്യുന്നതില്‍ നിന്നും വിലക്കിക്കൊണ്ടുള്ള പ്രത്യേക ഹദീസുകള്‍ കാണാം. അത്തരം കാര്യങ്ങളും വില്‍ക്കാനോ, വാങ്ങാനോ പാടില്ല.

ഉദാ: നായയെ വില്‍ക്കുന്നതും അതിന്റെ പണം കൈപ്പട്ടുന്നതും പ്രവാചകന്‍(സ) വിലക്കി.

  അബൂ മസ്ഊദ് (റ) വില്‍ നിന്നും നിവേദനം:

عَنْ أَبِي مَسْعُودٍ الأَنْصَارِيِّ رَضِيَ اللَّهُ عَنْهُ أَنَّ رَسُولَ اللَّهِ صَلَّى اللَّه عَلَيْهِ وَسَلَّمَ نَهَى عَنْ ثَمَنِ الْكَلْبِ وَمَهْرِ الْبَغِيِّ وَحُلْوَانِ الْكَاهِنِ

 " റസൂലുല്ലാഹി (സ) നായയെ വിറ്റ് ലഭിക്കുന്ന പണവും, വ്യഭിചാരത്തിലൂടെ ലഭിക്കുന്ന പണവും, ജ്യോതിഷത്തിലൂടെ ലഭിക്കുന്ന പണവും വിലക്കിയിരിക്കുന്നു." - [ബുഖാരി 2083, മുസ്‌ലിം 2930].


ഇബ്നു അബ്ബാസ് (റ) വില്‍ നിന്നും നിവേദനം:

عَنْ عَبْدِ اللَّهِ بْنِ عَبَّاسٍ رضي الله عنهما قَالَ :  نَهَى رَسُولُ اللَّهِ صَلَّى اللَّهُ عَلَيْهِ وَسَلَّمَ عَنْ ثَمَنِ الْكَلْبِ ، وَإِنْ جَاءَ يَطْلُبُ ثَمَنَ الْكَلْبِ فَامْلأْ كَفَّهُ تُرَابًا

"നായയെ വിറ്റ് ലഭിക്കുന്ന പണം നബിതിരുമേനി (സ) വിരോധിച്ചിരിക്കുന്നു. അതുകൊണ്ട് നായയുടെ പണം ചോദിച്ചുകൊണ്ട് ആരെങ്കിലും വന്നാല്‍ അവന്റെ കൈനിറയെ മണ്ണ്‌ കൊടുക്കുക. " - [അബൂ ദാവൂദ് : 3021, അല്‍ബാനി-സ്വഹീഹ്]. 


 വേട്ടക്കും, കൃഷിക്കോ, ആടുമാടുകള്‍ക്കോ കാവലിനായും നായയെ ഉപയോഗിക്കാന്‍ അനുവാദമുണ്ട് എങ്കില്‍ പോലും നായയെ വില്‍ക്കുകയും വാങ്ങുകയും ചെയ്യുന്നത് നിഷിദ്ധമാണ്. ഇതാണ് പൂരിപക്ഷം പണ്ഡിതന്മാരുടെയും അഭിപ്രായം.

ഹാഫിദ് ഇബ്നു ഹജര്‍ അല്‍ അസ്ഖലാനി (റഹി) നായയെ വിറ്റ് ലഭിക്കുന്ന പണം വിലക്കിക്കൊണ്ട് വന്ന ഹദീസുകള്‍ വിശദീകരിച്ചുകൊണ്ട് പറയുന്നു : "ഇവിടെ പരാമര്‍ശിക്കപ്പെട്ട വിലക്കില്‍ നിന്നും അത് വില്‍ക്കല്‍ നിഷിദ്ധമാണ് എന്നത് വളരെ പ്രകടമാണ്. പരിശീലനം നല്‍കിയ നായ ആയാലും, അനുവദിക്കപ്പെട്ട കാര്യങ്ങള്‍ക്ക് ഉപയോഗിക്കാന്‍ വേണ്ടിയുള്ള നായയാലും, അവയെല്ലാം തന്നെ നിഷിദ്ധമാണ് എന്നതാണ് ഈ ഹദീസ് സൂചിപ്പിക്കുന്നത്."

ഇമാം നവവി (റഹി) ശറഹു മുസ്‌ലിമില്‍ പറയുന്നു : "നായയെ വിറ്റ് ലഭിക്കുന്ന പണം നിഷിദ്ധമാണ് എന്നതും, അത് മോശം സമ്പാദ്യമാണ് എന്നതും, അത് മ്ലേച്ചമാണ് എന്നതുമെല്ലാം അത് വില്‍ക്കല്‍ നിഷിദ്ധമാണ് എന്നതിനെ സൂചിപ്പിക്കുന്നു." അനുവദനീയമായ ആവശ്യങ്ങള്‍ക്ക് വേണ്ടിയാണെങ്കില്‍ പോലും നായയെ വില്‍ക്കുന്നത് നിഷിദ്ധമാണ് എന്ന അഭിപ്രായമാണ് ഇമാം നവവി രേഖപ്പെടുത്തിയിട്ടുള്ളത്.

ഇബ്നു ഉസൈമീന്‍ (റഹി) പറയുന്നു: " വേട്ടക്ക് വേണ്ടിയാണ് വില്‍ക്കുന്നത് എങ്കില്‍പോലും നായയെ വില്‍ക്കല്‍ അനുവദനീയമല്ല". - [ശറഹുല്‍ മുംതിഅ് : 8/90].

ലിജ്നതുദ്ദാഇമയുടെ ഫത്'വയില്‍ കാണാം: "നായയെ വില്‍ക്കാനോ, അത് വിറ്റുകിട്ടുന്ന പണം ഉപയോഗിക്കാനോ പാടില്ല. കാവലിനും വേട്ടക്കും ഉള്ള നായയാണെങ്കില്‍ പോലും." - [ഫതാവ ലിജ്ന ദാഇമ13/36].

എന്നാല്‍ അനുവദനീയമായ കാര്യങ്ങള്‍ക്ക് വില്‍ക്കാം എന്ന അഭിപ്രായക്കാരനാണ് ഇമാം അബൂ ഹനീഫ. എന്നാല്‍ അത് വിലക്കിക്കൊണ്ട് വന്ന ധാരാളം ഹദീസുകള്‍ പരിശോധിച്ചാല്‍ അനുവദനീയമായ കാര്യങ്ങള്‍ക്ക് വേണ്ടിയാണെങ്കില്‍ പോലും അതിന്‍റെ വില്പന അനുവദനീയമല്ല എന്നതാണ് സൂക്ഷ്മത. വേട്ടക്കുള്ള നായയെ വില്‍ക്കല്‍ അനുവദനീയമാണ് എന്നതിന് ഈ അഭിപ്രായക്കാര്‍ തെളിവ് പിടിക്കുന്ന ഹദീസ് ദുര്‍ബലവുമാണ്.




നായയെ വില്‍ക്കുന്നതും വാങ്ങുന്നതുമായി ബന്ധപ്പെട്ട വിധി വിശദീകരിക്കുക എന്ന അര്‍ത്ഥത്തിലല്ല നാമിത് ഇവിടെ ഉദ്ദരിച്ചത്. മറിച്ച് അനുവദനീയമായ ഉപയോഗമുള്ള വസ്തുവാണെങ്കില്‍ പോലും അത്തിന്റെ വില്പന റസൂലുല്ല വിരോധിചിട്ടുണ്ടെങ്കില്‍ അത് വില്‍ക്കല്‍ നിഷിദ്ധമായിത്തീരും എന്നത് മനസ്സിലാക്കാനാണ് ഈ ചര്‍ച്ച ഇവിടെ ഉദ്ദരിച്ചത്. യഥാര്‍ത്ഥത്തില്‍ ആ വിഷയ സംബന്ധമായി ഇനിയും ഒരുപാട് വിശദീകരിക്കുവാനുണ്ട് എങ്കിലും അടിസ്ഥാനപരമായ വിഷയത്തില്‍ നിന്ന് ശ്രദ്ധ തെറ്റാന്‍ ഇടവരുത്തും എന്നതുകൊണ്ട്‌ കൂടുതല്‍ വിശദീകരിക്കുന്നില്ല.

ചുരുക്കത്തില്‍ മൂന്നാമത്തെ നിബന്ധനയുമായി ബന്ധപ്പെട്ട് നാം മനസ്സിലാക്കേണ്ടത് മൂന്നു കാര്യങ്ങളാണ്:

 - വില്‍ക്കപ്പെടുന്ന വസ്തു ഉപയോഗശൂന്യമായ വസ്തു ആകാന്‍ പാടില്ല. അതുകൊണ്ട് പ്രയോജനം ഉണ്ടായിരിക്കണം.

- അതിന്‍റെ ഉപയോഗവും പ്രയോജനവും, മതപരമായി അനുവദനീയമായ പ്രയോജനം ആയിരിക്കണം.

- അനുവദിക്കപ്പെട്ട പ്രയോജനം ഉണ്ടെങ്കില്‍ കൂടി, തത് വസ്തുവിന്റെ  വില്പന വിരോധിച്ചുകൊണ്ടുള്ള പ്രത്യേക തെളിവുകള്‍ വന്നിട്ടുണ്ടെങ്കില്‍ അതിന്‍റെ വില്പന നിഷിദ്ധമായിരിക്കും.

(ബാക്കിയുള്ള നിബന്ധനകള്‍ അടുത്ത ലക്കത്തില്‍) .... തുടരും
-----------------

(വാട്ട്സാപ്പിലൂടെ നമ്മള്‍ നടത്തുന്ന കച്ചവടത്തെ സംബന്ധിച്ചുള്ള കര്‍മശാസ്ത്രപഠനം ടൈപ്പ് ചെയ്തതാണ് ഇത്. അത് ആളുകള്‍ക്ക് ലഭിക്കാവുന്ന രൂപത്തില്‍ ടൈപ്പ് ചെയ്ത് നല്‍കിയ സഹോദരന് അല്ലാഹു ഇഹത്തിലും പരത്തിലും തക്കതായ പ്രതിഫലം നല്‍കട്ടെ)

ഹൂഥികളും ചില കേരളീയരും തമ്മില്‍ അവിഹിത ബന്ധമോ ?!.

 الحمد لله و الصلاة والسلام على رسول الله ، وعلى آله و صحبه ومن والاه، وبعد؛

'ആസ്വിഫതുല്‍ ഹസം'  നേട്ടങ്ങള്‍ കൈവരിച്ച് ദൗത്യവുമായി മുന്നോട്ട് പോകുമ്പോള്‍ കേരളത്തിലെ ചില അവിഹിത ബന്ധങ്ങളും പുറത്ത് വരുന്നത് അതിന്‍റെ നേട്ടങ്ങളില്‍ ഒന്നായി എണ്ണാം.

വര്‍ഗ്ഗീയതയെ മുതലെടുത്ത്‌ ജീവിക്കുന്ന ഹൂതീ, ലബനാനിലെ ഹിസ്ബുശൈത്താന്‍ എന്നിവയെ മുന്‍പും ഇപ്പോഴും വാനോളം പുകഴ്ത്തി പരിശുദ്ധരാക്കി വാഴിക്കുകയാണ് ചില പ്രസ്ഥാനക്കാര്‍. ഇസ്‌ലാമിക രാഷ്ട്രം എന്നതാണ് ഇവരുടെ ലക്ഷ്യമായി ഇവര്‍ പറയുന്നത് എങ്കിലും അവര്‍ക്ക് ലോകത്ത് ഏറ്റവും ശത്രുതയുള്ള രാജ്യം ഏത് എന്ന് ചോദിച്ചാല്‍, പെട്ടെന്ന് തന്നെ മറുപടി വരും, 'ലോകത്ത് ശരീഅത്ത് (വിശ്വാസ തലത്തിലും, നിയമ തലത്തിലും) നടപ്പാക്കുന്ന ഏക രാഷ്ട്രമായ, മക്കയും മദീനയും സ്ഥിതി ചെയ്യുന്ന സൗദി അറേബ്യയാണ് അവരുടെ മുഖ്യശത്രു'.

ഉറ്റ മിത്രമോ ഇറാന്‍ !... സിറിയയിലെ പാവപ്പെട്ട രണ്ടര ലക്ഷത്തോളം വരുന്ന  മുസ്‌ലിമീങ്ങളെ അറുകൊല ചെയ്തതില്‍ ഹിസ്ബുശൈത്താന്റെയും ഇറാനിയന്‍ സൈന്യത്തിന്റെയും പങ്ക് ലോകത്തുള്ള സര്‍വ മുസ്ലിമീങ്ങളും അറിഞ്ഞിട്ടും, സിറിയന്‍ വിമോചന സഖ്യം തന്നെ ലോകത്തോട് പല തവണ അത് വിളിച്ചുപറഞ്ഞിട്ടും ഇവര്‍ മാത്രം അതറിഞ്ഞിട്ടില്ല ... അത്ഭുതം തന്നെ !..

'ഹൂഥികള്‍ കടമ്പകള്‍ കടന്നെത്തിയ നവോദ്ധാന പ്രവര്‍ത്തകര്‍' ഇതാണ് തേജസുകാരന്‍ ഹൂഥികള്‍ക്ക് ചാര്‍ത്തിക്കൊടുത്ത വിശേഷണം. എന്നാല്‍ തേജസിലെ റിപ്പോര്‍ട്ടുകളിലുള്ള വൈരുധ്യങ്ങളിലേക്ക് അല്പം കണ്ണോടിക്കാം..

1-  തേജസുകാരന്‍ പറയുന്നു : "സംഘം തങ്ങള്‍ക്ക് ഭീഷണിയാകുമെന്ന് മനസ്സിലാക്കിയ മുന്‍ ഏകാധിപതി അലി അബ്ദുല്ലാഹ് സ്വാലിഹ് അടക്കമുള്ളവര്‍ ഇവര്‍ക്കെതിരെ കടുത്ത വിവേചനം കാണിച്ചു."  . ലേഖനത്തിലുടനീളം ഏകാധിപതി അലി സ്വാലിഹും ഹൂഥികളും ബദ്ധവൈരികളാണ് എന്ന് തെളിയിക്കാനാണ് തേജസിന്റെ ശ്രമം. എന്നാല്‍ ഇതേ അലി അബ്ദല്ലാഹ്  സ്വാലിഹുമായി ചേര്‍ന്നാണ് ഹൂഥികള്‍ സൗദിക്കെതിരെ പോരാടുന്നത് എന്നതിനെ തേജസുകാരന്‍ എങ്ങനെ നോക്കിക്കാണുന്നു എന്നറിയില്ല. പക്ഷെ നമുക്കതില്‍ ഒരുപാട് പാഠമുണ്ട്. അഹ്ലുസ്സുന്ന തിങ്ങിപ്പാര്‍ത്തിരുന്ന മേഖലകളില്‍ ഉപരോധം ഏര്‍പ്പെടുത്തി, ഹൂഥികള്‍ ജനങ്ങളെ പട്ടിണിക്കിട്ടത് ഈ പറഞ്ഞ ഏകാധിപതിയുടെ കാലത്താണ്. അന്ന് അവരെ സഹായിക്കാന്‍ ഇയാള്‍ ഒന്നും ചെയ്തില്ല. ഹൂഥികള്‍ യമന്‍ കയ്യടക്കാന്‍ വന്നപ്പോള്‍ പ്രത്യക്ഷത്തില്‍ അവരുടെ ശത്രുവായി അഭിനയിച്ച അലി സ്വാലിഹ് മുന്‍പ് പറഞ്ഞുറപ്പിച്ചത് പോലെ ഹൂഥികള്‍ക്ക് അരങ്ങൊഴിഞ്ഞു കൊടുത്തു. 'ആസ്വിഫതുല്‍ ഹസം' തുടങ്ങിയപ്പോള്‍ സൗദിക്കും സഖ്യകക്ഷികള്‍ക്കും എതിരില്‍ ഒരുമിച്ച് യുദ്ധം ചെയ്ത് ഈ അവിഹിത ബന്ധം വളരെ നേരത്തേ തുടങ്ങിയതാണ്‌ എന്നവര്‍ തെളിയിച്ചു. ഹൂഥി - അലി സ്വാലിഹ് സഖ്യമാണ് ഇന്ന് സൗദിയുമായി ഏറ്റുമുട്ടുന്നത് എന്ന വസ്തുത വളരെ തന്ത്രപൂര്‍വ്വം മറച്ചുവെക്കാനാണ് തേജസുകാരന്‍ ശ്രമിച്ചത്.


2 -  തേജസിലെ ലേഖനം കേട്ടാല്‍ തോന്നും സമാധാനത്തിന് നോബല്‍ സമ്മാനം അര്‍ഹിക്കുന്ന ഏതോ നവോദ്ധാനക്കാരാണ് ഹൂഥികള്‍ എന്ന്. അവര്‍ പറയുന്നു : "2011ല്‍ അറബ് വിപ്ലവം തുടങ്ങിയപ്പോള്‍ സമാധാനപരമായ പ്രക്ഷോഭത്തിന്റെ വക്താക്കളായിരുന്നു ഹൂഥികള്‍.  തുടര്‍ന്ന് സ്വാലിഹ് പുറത്താക്കപ്പെട്ട ശേഷം നടന്ന ദേശീയ സമവായ ചര്‍ച്ചകളിലും മുഖ്യ പങ്ക് വഹിച്ചു. വൈവിധ്യത്തെ മാനിച്ചും മേഖലാ സ്വയം ഭരണത്തെ പിന്തുണച്ചും ജനാധിപത്യ രാഷ്ട്രം വേണം എന്നവര്‍ വാദിച്ചു".  തീര്‍ത്തും കല്ലേറ് വളരെ സമാധാനപരമായിരുന്നു എന്ന് പറയുന്ന പോലെയാണ് തേജസുകാരന്റെ വര്‍ണ്ണന. ഈ പറയുന്ന ഹൂഥികളാണ് വിപ്ലവ കാലത്ത് തീര്‍ത്തും (തേജസുകാരന്റെ ഭാഷയില്‍ തീര്‍ത്തും സമാധാനപരമായി) ദമ്മാജിലെ പാവപ്പെട്ട മുസ്ലിമീങ്ങളെ ഉപരോധിച്ച് അവര്‍ക്കെതിരെ സായുധ ആക്രമണം നടത്തിയത്. ഒടുവില്‍ അവരെ ദമ്മാജില്‍ നിന്നും തന്നെ പാലായനം ചെയ്യാന്‍ നിര്‍ബന്ധിച്ചു. ഇത് തേജസുകാരന്‍ അറിയാതെ പോയോ ?!.. വഴിയില്ല. പൂരിപക്ഷം വരുന്ന യമന്‍ ഗോത്രങ്ങളുമായി ഏറ്റുമുട്ടിയാണ് സ്വന്‍ആഇലേക്ക് ഹൂഥികള്‍ അതിക്രമിച്ച് കയറിയത് എന്നത് ഒരു വിഷയമേ അല്ല. വര്‍ഷങ്ങള്‍ക്ക് മുന്‍പ് സൗദി അതിര്‍ത്തിയില്‍ ജീസാന്‍ പോലെയുള്ള പ്രദേശങ്ങളെ ഭീഷണി മുനയില്‍ നിര്‍ത്തിയവരും ഇടക്കൊക്കെ അതിര്‍ത്തി ബേധിക്കാന്‍ ശ്രമിച്ച് സംഘട്ടനങ്ങള്‍ നടത്തിയവരുമാണ് ഈ ഹൂഥികള്‍ എന്ന ഒരു സംഗതി ഈ ലോകത്ത് നടന്നിട്ടേയില്ല.  പാവങ്ങള്‍ നവോദ്ധാന പ്രവര്‍ത്തനങ്ങളുമായി മുന്നോട്ട് പോകുകയായിരുന്നു... എന്നൊക്കെ അങ്ങ് വിശ്വസിക്കുക തന്നെ... 

ഏതാണ് തേജസുകാരന്‍ പരിചയപ്പെടുത്തുന്ന ഈ നവോദ്ധാന പ്രവര്‍ത്തനം ?! ... അതാണ്‌ ഇറാനുമായുള്ള അവിഹിത ബന്ധം സൂചിപ്പിക്കുന്ന മറ്റൊരു വിഷയം. ഇന്നലെ ഇറാനിയന്‍ വിദേശകാര്യ സഹമന്ത്രി ഒരു പ്രസ്ഥാവന നടത്തി, അതിനു മുന്‍പ് ഇറാനിയന്‍ വിദേശകാര്യ മന്ത്രി തന്നെ അത് പ്രസ്താവിച്ചിട്ടുള്ളതുമാണ്. അതായത് യമന്‍ ആഭ്യന്തര പ്രശ്നത്തില്‍ സൗദി ഇടപെടുന്നുത് തീവ്രവാദമാണ്. പറയുന്നതോ പാവം ഇറാന്‍... വേശ്യയുടെ ചാരിത്ര്യ പ്രസംഗം എന്ന് വിശേഷിപ്പിച്ചാല്‍ അതല്‍പ്പം കുറഞ്ഞുപോകും. സിറിയയില്‍ മുസ്ലിമീങ്ങളെ കൊന്നൊടുക്കാന്‍ ബഷാറിന് പിന്തുണ അറിയിക്കുകയും സൈന്യത്തെ അയക്കുകയും ചെയ്ത ആളാണ്‌ കക്ഷി.... അമേരിക്ക വളരെ സുന്ദരമായി ഇറാഖ് തങ്ങളെ ഏല്‍പ്പിച്ച പോലെ യമനും ഏല്‍പ്പിച്ചു തരുമെന്ന് പാവങ്ങള്‍ സ്വപ്നം കാണുമ്പോഴാണ് പ്രതീക്ഷിക്കാതെ വന്ന അടി. സമനില തെറ്റിയതില്‍ അത്ഭുതമൊന്നുമില്ല.

ഇവിടെ ചില ചോദ്യങ്ങള്‍ പ്രസക്തമാണ്:

യമനില്‍ സൗദി ഇടപെടുന്നത് എന്തുകൊണ്ട് ഇറാനെ ചൊടിപ്പിക്കുന്നു ?.

ആശയപരമായും , നയതന്ത്രപരമായും ഇറാന് എന്ത് കാര്യമാണ് അറബ് ലോകത്ത് ഉള്ളത് ?.

കേവല ന്യൂനപക്ഷമായ ഹൂഥികള്‍ പൂരിപക്ഷം വരുന്ന യമന്‍ ജനങ്ങളെ അടിച്ചമര്‍ത്തി അധികാരം പിടിച്ചെടുക്കുമ്പോള്‍, എന്തുകൊണ്ട് ഇറാനും, അവരെ പിന്തുണക്കുന്ന SDPI , ജമാഅത്തെ ഇസ്‌ലാമി പോലുള്ള തീവ്രവാദ പ്രസ്ഥാനക്കാരും അത് നവോദ്ധാനമായി കാണുകയും, യമനിലെ പൂരിപക്ഷ ജനങ്ങള്‍ ആഗ്രഹിച്ച സൗദി ഇടപെടലിനെ തീവ്രവാദമായി കാണുകയും ചെയ്യുന്നു ?!.

ഉത്തരം വളരെ വ്യക്തമാണ്. അറബ് ലോകങ്ങളെ കയ്യടക്കി ഇറാനിയന്‍ ശിയാ സാമ്രാജ്യം സ്ഥാപിക്കുക തന്നെ ലക്ഷ്യം. അതിന് വേണ്ടപ്പെട്ടവരെല്ലാം കുടപിടിക്കുന്നുമുണ്ടല്ലോ. വിശ്വാസപരമായി സൗദിയുമായി ഒരുനിലക്കും യോജിക്കാന്‍ ഇറാന്  കഴിയില്ല. അവരുടെ നമസ്കാരം പോലും വ്യത്യസ്ഥമാണ്. ആചാരങ്ങള്‍ വ്യത്യസ്ഥമാണ്. പ്രവാചക പത്നിമാരെപ്പോലും അധിക്ഷേപിക്കുന്ന പൂരിപക്ഷ ശിയാ കക്ഷിയാണ് നേതൃ നിരയില്‍. എന്ത് വിലകൊടുത്തും അഹ്ലുസ്സുന്നയെ കൊല്ലണമെന്ന് പ്രഖ്യാപിച്ച താക്കറെമാരും അവരുടെ കൂട്ടത്തില്‍ ഏറെ. എഴാകാശങ്ങള്‍ക്ക് മുകളില്‍ നിന്ന് അല്ലാഹു പവിത്രവതിയെന്ന് പ്രഖ്യാപിച്ച നമ്മുടെ മാതാവ് റസൂലുല്ല (സ) യുടെ പത്നി ഉമ്മുല്‍ മുഅ്മിനീന്‍ ആഇഷ (റ) യെ അവിഹിത ബന്ധം ആരോപിക്കുകയും (നഊദു ബില്ലാഹ്) അഹ്ലുസ്സുന്നക്കാര്‍ അറുകൊല ചെയ്യപ്പെടണമെന്ന് വാദിക്കുകയും ചെയ്ത യാസിര്‍ ഹബീബ് എന്ന പിശാചിനെ കുവൈറ്റ്‌ പൗരത്വം പിന്‍വലിച്ച് നാടുകടത്തിയത് ഈ സന്ദര്‍ഭത്തില്‍ സ്മരിക്കുന്നത് നന്നായിരിക്കും. ടിയാന്‍ ഇപ്പോള്‍ ഇവരുടെ ആശയ തട്ടകമായ ബ്രിട്ടനിലാണ്.

ഇനി എന്തുകൊണ്ട് ഇവര്‍ സൗദിയെ എതിര്‍ക്കുന്നു എന്ന് ഞാന്‍ പറയേണ്ടതില്ലല്ലോ. ഇത്ര നീചരായ ഈ സമൂഹത്തെ പിന്തുണക്കുന്നതിനും വേണം കണ്ടാമൃഗത്തിന്റെ തൊലിക്കട്ടി. സിറിയന്‍ പശ്ചാത്തലത്തിലെങ്കിലും ഇവരുടെ വാലാട്ടികള്‍ മാറി ചിന്തിക്കുമെന്ന് ധരിച്ചവര്‍ക്ക് തെറ്റി.  സത്യത്തില്‍ ഇസ്ലാമിന്റെ സംരക്ഷകരായി  സ്വയം വാഴ്ത്തുന്ന ഇവര്‍ക്ക് മുസ്ലിംകളോടുള്ള കൂറ് എന്ത് എന്ന് ഇവിടെ വ്യക്തം. ജമാഅത്ത് കാരനോ, SDPI കാരനോ ആണ് സൗദി ഭരിക്കുന്നതെങ്കില്‍ എന്നൊന്ന് സങ്കല്പിച്ചു നോക്കൂ...  ഇറാനില്‍ കിടക്കുന്ന ശിയാക്കള്‍ അവരുടെ പേക്കൂത്ത് നടത്തുന്നത് മക്കത്തും മദീനത്തും ആയിരിക്കും  ... ജമാഅത്ത് കാര്‍ ചിലപ്പോള്‍ ഭരണകൂടത്തിന്‍റെ ചിലവില്‍ മക്കത്ത് ഒരു പക്ഷെ വേള്‍ഡ് ഫിലിം ഫെസ്റ്റിവലും നടത്തിയേക്കാം,, ദഅവത്തിനുള്ള പുതിയ ഉദാത്ത മാതൃകയാണല്ലോ ...  

3- SDPI കാരന്റെയും, കേരളാ ആഗോള ഇസ്‌ലാം വക്താക്കളുടെയും വൈരുദ്ധ്യങ്ങള്‍ പെട്ട മറ്റൊന്നാണ്... ഖത്തറിനെയും തുര്‍ക്കിയെയും ഒരു ഘട്ടത്തില്‍ വാനോളം പുകഴ്ത്തി,,, എന്നാല്‍ ഇറാന്‍ പിന്തുണക്കുന്ന ഹൂഥികള്‍ ഒരു വശത്തും, തുര്‍ക്കി, തൂനിസ്, ഖത്തര്‍ അടക്കമുള്ള രാജ്യങ്ങള്‍ പിന്തുണക്കുന്ന സൗദീ നീക്കം ഒരു വശത്തതുമായപ്പോള്‍ സത്യത്തില്‍ തങ്ങള്‍ ആരുടെ കൂടെയാണെന്നോ, തങ്ങളുടെ ആശയം എന്തെന്നോ ഈ രണ്ടുകൂട്ടര്‍ക്കും അറിയില്ല. മുന്‍പേ തങ്ങള്‍ പറയുന്നത് എന്ത് എന്ന് സ്വയം മനസ്സിലാക്കാനുള്ള കഴിവ് ഉണ്ടായിരുന്നുവെങ്കില്‍ ഇവരാരും അതിന്‍റെ വക്താക്കള്‍ ആകുമായിരുന്നില്ലല്ലോ...


ആദ്യമായും അവസാനമായും SDPI കാരനോടും ജമാഅത്ത് കാരനോടും ഒരൊറ്റ ചോദ്യമാണ് നമുക്ക് ചോദിക്കുവാനുള്ളത്. രാഷ്ട്രീയ ചര്‍ച്ചകളില്‍ നിലപാട് വ്യക്തമാക്കാന്‍ ഉത്സാഹം കാണിക്കുന്ന പോലെ വിശ്വാസ തലങ്ങളില്‍ നിങ്ങളും ശിയാക്കളും തമ്മിലുള്ള 'ബന്ധം' അതല്ലെങ്കില്‍ 'വിയോജിപ്പ്‌' ഇത് രണ്ടിലും ഏതെങ്കിലും ഒന്ന് വ്യക്തമാക്കാന്‍ നിങ്ങള്‍ക്ക് സാധിക്കുമോ ?...

ഏതായാലും അറബ് ലോകത്തെ പുതിയ സഖ്യം ചിലരുടെയെല്ലാം ഉറക്കം കെടുത്തുന്നു. അവരുമായി അവിഹിത ബന്ധം ഉള്ളവരുടെയും ....


'ആസ്വിഫതുല്‍ ഹസം' - അറബ് ലോകത്ത് ഇറാന്‍ നടത്തുന്ന രഹസ്യ അജണ്ടകള്‍ക്കുള്ള തിരിച്ചടി. 

'ആസ്വിഫതുല്‍ ഹസം' - അറബ് ലോകത്ത് ഇറാന്‍ നടത്തുന്ന രഹസ്യ അജണ്ടകള്‍ക്കുള്ള തിരിച്ചടി.

الحمد لله و الصلاة والسلام على رسول الله ، وعلى آله و صحبه ومن والاه، وبعد؛ 

 
യമനില്‍ റാഫിദിയാക്കളും സൗദിയുടെ നേതൃത്വത്തില്‍ അണിനിരന്ന മുസ്‌ലിം രാഷ്ട്രങ്ങളും തമ്മില്‍ നടക്കുന്ന യുദ്ധം നമ്മുടെയെല്ലാം ശ്രദ്ധയില്‍ പെട്ടിട്ടുണ്ടാകും. ചിലര്‍  മൊഴിയുന്ന പോലെ യമനില്‍ നിലനിന്നിരുന്ന ആഭ്യന്തര കലഹത്തില്‍ സൗദി നടത്തിയ ഒരനാവശ്യ ഇടപെടലായിരുന്നില്ല അത്. മറിച്ച് ഹൂതികള്‍ എന്നറിയപ്പെടുന്ന യമനിലെ റാഫിദിയാക്കള്‍ ക്ഷണിച്ചുവരുത്തിയ ഒരു സംഘട്ടനമാണ്.  അതുമായി ബന്ധപ്പെട്ട് അറിഞ്ഞിരിക്കേണ്ട ചില വസ്തുതകളുണ്ട്.

 കാലങ്ങളോളമായി യമനിലെ മുസ്ലിമീങ്ങള്‍ക്ക് നേരെ ഭീഷണിയും അക്രമങ്ങളും അഴിച്ചുവിട്ടിരുന്നവരായിരുന്നു ഹൂതികള്‍. മൂന്ന്‍ ദിവസം മുമ്പ് തുടങ്ങിയ 'ആസിഫതുല്‍ ഹസം' എന്ന സൗദീ വ്യോമാക്രമണത്തിന് വര്‍ഷങ്ങള്‍ക്ക് മുന്‍പ് തന്നെ യമന്‍ സൗദി അതിര്‍ത്തി  പ്രദേശത്ത് സായുധ സംഘത്തെ വിന്യസിക്കുകയും കാലങ്ങളായി സൗദി അതിര്‍ത്തി ഭേദിക്കാന്‍ ശ്രമിച്ചുകൊണ്ടിരിക്കുകയും ചെയ്യുന്നവരാണ് ഹൂതികള്‍. യമനിലെ ആഭ്യന്തര കലാപം മുതലെടുത്ത്‌ അവിടത്തെ മുന്‍ഭരണാധികാരിയായിരുന്ന അലി അബ്ദല്ല സ്വാലിഹിന്‍റെ ഒത്താശയോടെ അവര്‍ യമന്‍ തലസ്ഥാനമായ സ്വന്‍ആ' കയ്യടക്കി.  ആഭ്യന്തര കലാപത്തെ മറയാക്കി അഹ്ലുസ്സുന്നയുടെ ആളുകള്‍ താമസിച്ചിരുന്ന പ്രവിശ്യകള്‍ തിരഞ്ഞുപിടിച്ച് ഹൂതികള്‍ നടത്തിയിരുന്ന അതിക്രമങ്ങള്‍ മുന്‍പ് നാം കേട്ടതാണ്.

ശേഷം നമ്മള്‍ കണ്ടത് അലി അബ്ദല്ല പുറത്തായ ശേഷം തിരഞ്ഞെടുക്കപ്പെട്ട അബ്ദുറബ്ബ് ഹാദിയെ തങ്ങളുടെ ആശയക്കാരനല്ല എന്ന കാരണത്താല്‍ സായുധ നീക്കത്തിലൂടെ പുറത്താക്കി ഹൂതികള്‍ യമന്‍ പിടിച്ചെടുത്തു. പ്രദേശവാസികളുടെ എളിയ ചെറുത്ത് നില്പ് അവര്‍ നിഷ്കരുണം നേരിടുകയും വളരെ വൈകാതെ ഇറാനിന്റെ ഒത്താശയോടെ യമന്‍ ഹൂതികളുടെ നിയന്ത്രണത്തിലുള്ള രാജ്യമായി പ്രഖ്യാപിക്കുകയും ചെയ്തു.

ഇറാനിയന്‍ (ശിയാ) സാമ്രാജ്യത്തിന്‍റെ തുടക്കമാണ് നാല് അറബ് രാഷ്ട്രങ്ങള്‍ കയ്യിലൊതുക്കി തങ്ങള്‍ തുടക്കമിട്ടത് എന്ന് പരസ്യമായി പറയാന്‍ പോലും അവര്‍ മടിച്ചില്ല. ഉസ്മാനിയാക്കളുടെ തലസ്ഥാനമായിരുന്ന ബാഗ്ദാദ്, അബ്ബാസിയാക്കളുടെ തലസ്ഥാനമായിരുന്ന ദിമശ്ഖ് അതുകൂടാതെ ലബനാന്‍, യമന്‍ ഇവയെല്ലാം തങ്ങളുടെ കൈപിടിയിലാണ് എന്ന് അബ്ദുല്‍ മലിക് ഹൂതിയെ പോലെയുള്ളവര്‍ പരസ്യമായി മീഡിയക്ക് മുന്നില്‍ വിളമ്പിയതാണ്.

ഇവിടെ സ്വാഭാവികമായും ഉയര്‍ന്നു വരുന്ന ഒരു ചോദ്യമാണ് അറബ് ലോകത്ത് ഇറാനെന്ത്‌ കാര്യം എന്നുള്ളത് ?!. സ്വാഭാവികമായും അവര്‍ക്ക് ചില രഹസ്യ താല്പര്യങ്ങളുണ്ട്. തങ്ങളുടെ ആശയങ്ങള്‍ ഉള്‍ക്കൊള്ളുന്ന സായുധ സംഘങ്ങളെ ഉള്‍ക്കൊള്ളിച്ച് സായുധ നീക്കത്തിലൂടെ അറബ് രാഷ്ട്രങ്ങള്‍ കയ്യിലൊതുക്കി 'ഇറാനിയന്‍ എംപയര്‍' എന്ന സ്വപ്നം സാക്ഷാല്‍ക്കരിക്കുക എന്നത് തന്നെയാണ് ആ രഹസ്യ താല്പര്യം. അതുമായി ബന്ധപ്പെട്ട ശിയാ ലോബിയുടെ രഹസ്യ അജണ്ട നേരത്തെ ചോര്‍ന്നതുമാണ്.

സിറിയയില്‍ രണ്ടര ലക്ഷത്തോളം വരുന്ന മുസ്ലിമീങ്ങളെ വധിച്ചതുമായി ബന്ധപ്പെട്ട് ഇറാനിയന്‍ സൈന്യത്തിന്‍റെ പങ്ക് വെളിച്ചത്ത് വന്നപ്പോള്‍ ആദ്യം അവര്‍ നിഷേധിച്ചു. അവിടത്തെ കാര്യങ്ങളെക്കുറിച്ച് അറിയാന്‍ നയതന്ത്രജ്ഞര്‍ മാത്രമാണ് അവിടെയുള്ളത് എന്നായിരുന്നു ഔദ്യോഗിക  വിശദീകരണം. പക്ഷെ ഇറാനിയന്‍ സൈന്യത്തിന്‍റെ പങ്ക് മാധ്യമങ്ങള്‍ തെളിവ് സഹിതം പുറത്ത് കൊണ്ടുവന്നപ്പോള്‍ അതിനെ ന്യായീകരിച്ചു.

ആശയപരമായും നയതന്ത്രപരമായും സൌദിയെപ്പോലുള്ള ഒരു ഇസ്‌ലാമിക രാഷ്ട്രത്തിന് ഭീഷണിയായ ഇറാനിയന്‍ സ്വാധീനം മേഖലയില്‍ ആധിപത്യം സ്ഥാപിക്കുമ്പോള്‍ സ്വാഭാവികമായും ആ അപകടത്തെ പ്രതിരോധിക്കേണ്ടത് സര്‍വ മുസ്‌ലിം രാഷ്ട്രങ്ങളുടെയും ബാധ്യതയും കടമയുമാണ്. പ്രത്യേകിച്ചും സൗദി വ്യോമ ആക്രമണം തുടങ്ങുന്നതിന് ദിവസങ്ങള്‍ മുന്‍പ് യമന്‍ കൈയടക്കിയത് പോലെ ഇനി ഞങ്ങള്‍ സൗദിയും മറ്റു അറബ് രാഷ്ട്രങ്ങളും കൈയടക്കുമെന്ന ഭീഷണി ഹൂതികളുടെ നേതാവ് അബ്ദുല്‍ മലിക് മുഴക്കിയത് വളരെ പരസ്യമായാണ്. യഥാര്‍ത്ഥത്തില്‍ അവരുടെ അഹങ്കാരത്തിന് തടയിടാന്‍ അല്പം   വൈകി എന്നുവേണം പറയാന്‍.

ഇനി വ്യോമാക്രമണം തുടങ്ങിയതിനു ശേഷം ഹൂതികള്‍ എടുത്ത നിലപാടാണ് ഏറെ അതിശയകരം. ജനങ്ങള്‍ തിങ്ങിപ്പാര്‍ക്കുന്ന ഇടങ്ങളിലേക്ക് തങ്ങളുടെ ആയുധ ശേഖരങ്ങള്‍ മാറ്റി. വീടുകള്‍ക്ക് മുകളിലായി മിസൈലുകള്‍ സ്ഥാപിച്ചു. അറബ് രാഷ്ട്രങ്ങള്‍ ജനങ്ങളുടെ മേല്‍ വ്യോമാക്രമണം നടത്തുന്നു എന്ന് വരുത്തിത്തീര്‍ക്കാന്‍ ജനങ്ങളുടെ മേല്‍ ആയുധ പ്രയോഗങ്ങള്‍ നടത്തി. എന്നാല്‍ വിമാനങ്ങള്‍ നടത്തുന്ന ആക്രമണവും മറ്റും തിരിച്ചറിയാന്‍ കഴിവുള്ള യമന്‍ ഗോത്രങ്ങള്‍ ഹൂതികള്‍ക്ക് നേരെ തിരിയാന്‍ അതൊരു കാരണമായി എന്നതല്ലാതെ യാതൊരു പ്രയോജനവും അതുകൊണ്ട് ഉണ്ടായില്ല.


സൗദിയുടെ നേതൃത്വത്തില്‍ അറബ് രാഷ്ട്രങ്ങള്‍ നടത്തുന്ന ആക്രമണം ഒരിക്കലും ഒരു സുപ്രഭാതത്തില്‍ ആരംഭിച്ചതായിരുന്നില്ല. ദിവസങ്ങളോളം ചര്‍ച്ചകള്‍ക്കായി ഹൂതികളെ ക്ഷണിക്കുകയും സമാധാന സംഭാഷണങ്ങള്‍ക്ക് അവസരങ്ങള്‍ സൃഷ്ടിക്കുകയും ചെയ്തിരുന്നു. പക്ഷെ അതവര്‍ നിരസിക്കുകയും  തങ്ങളുടെ അഹങ്കാരം കലര്‍ന്ന പ്രഖ്യാപനങ്ങള്‍ തുടരുകയുമായിരുന്നു. യമന്‍ പ്രധാനമന്ത്രിയെ അവിടെ നിന്നും ആട്ടിയോടിച്ചു. അദ്ദേഹത്തിന്റെ അഭ്യര്‍ത്ഥനപ്രകാരമാണ് അറബ് രാഷ്ട്രങ്ങള്‍ യഥാര്‍ത്ഥത്തില്‍ ഇതില്‍ ഇടപെട്ടത്. മാത്രമല്ല പരിശുദ്ധ ഹറമുകള്‍ നിലകൊള്ളുന്ന സൗദിയെ സംരക്ഷിക്കുക എന്ന സുപ്രധാന ദൗത്യവും ഇതിനു പിന്നിലുണ്ട്. കാലങ്ങളായ സൗദി അതിര്‍ത്തിയില്‍ സായുധ നീക്കം നടത്തുന്ന ഹൂത്തികള്‍ യമനില്‍ നിലയുറപ്പിച്ചാല്‍ സൗദിയെയും മറ്റു അറബ് രാഷ്ട്രങ്ങളെയും ആക്രമിക്കുകയും ഇറാനിന്റെ ഒത്താശയോടെ അവിടെ ആഭ്യന്തര കലാപങ്ങള്‍ സൃഷ്ടിക്കുകയും ചെയ്യുമെന്നത് ഉറപ്പ്.

നാലോളം രാഷ്ട്രങ്ങള്‍ തുടങ്ങി വച്ച് ഇന്ന് പന്ത്രണ്ട് രാഷ്ട്രങ്ങള്‍ പങ്കെടുക്കുന്ന മുന്നേറ്റമാണ് 'ആസിഫതുല്‍ ഹസം'. അത് അതിന്‍റെ കൃത്യമായ ലക്ഷ്യങ്ങള്‍ നിറവേറ്റി മുന്നേറുന്നതില്‍ നമുക്ക് അല്ലാഹുവിനെ സ്തുതിക്കാം. മാത്രമല്ല അറബ് ലോകത്തെ പ്രശ്നങ്ങളെ നേരിടാന്‍ സജ്ജമായ ഒരു പുതിയ സഖ്യമാണ് 'ആസിഫതുല്‍ ഹസ്മി'ലൂടെ ഉണ്ടായത്. അല്ലാഹു സല്‍മാന്‍ രാജാവിന് ഏറ്റവും ഉചിതമായ തീരുമാനങ്ങള്‍ എടുക്കുവാനുള്ള എല്ലാ തൌഫീഖ്  നല്‍കുമാറാകട്ടെ .. ഏറ്റവും ഉചിതവും യുക്തിസഹജവുമായ തീരുമാനം എന്നാണ്  സൗദി പണ്ഡിത സഭ 'ആസിഫതുല്‍ ഹസ്മി'നെ സംബന്ധിച്ച് വിശേഷിപ്പിച്ചത്.

മലിക് ഫഹദിന് കുവൈറ്റ്‌ മോചിപ്പിക്കാന്‍ തൗഫീഖ് നല്‍കിയ പോലെ, മലിക് അബ്ദല്ലക്ക് ബഹ്‌റൈന്‍ മോചിപ്പിക്കാന്‍ തൗഫീഖ് നല്‍കിയ പോലെ, യമന്‍ മോചിപ്പിക്കാനുള്ള തൗഫീഖ് അല്ലാഹു സല്‍മാന്‍ രാജാവിന് നല്‍കുമാറാകട്ടെ...

ലബനാനിലും, സിറിയയിലും, ഇറാഖിലും അഹ്ലുസ്സുന്നയെ അറുകൊല ചെയ്യുന്ന ശിയാ ഭീകരതക്ക് ഇതൊരു പാഠമാണ്.


ആശയപരമായും നയതന്ത്രപരമായും ഇസ്‌ലാമിക രാഷ്ട്രങ്ങള്‍ക്ക് എന്നും ഭീഷണിയായിരുന്ന ഇറാനെ ഇസ്‌ലാമിക രാഷ്ട്രമായി പരിചയപ്പെടുത്തി, ശിയാ ഭീകരതക്ക് കുടപിടിച്ചിരുന്നവര്‍ക്കും ഇതൊരു പാഠമാണ്.


ഹറം കയ്യടക്കി ഹജറുല്‍ അസ്'വദ് വരെ കടത്തിക്കൊണ്ടുപോയ പാരമ്പര്യമുള്ള ശിയാക്കളെ ഇസ്‌ലാമിന്റെ വക്താക്കളായി പരിജയപ്പെടുത്താനും വേണം തൊലിക്കട്ടി.. മോന്‍ മരിച്ചിട്ടായാലും മരുമോളുടെ കണ്ണീരു കണ്ടാല്‍ മതി എന്നതാണല്ലോ ഭാവം... ശിയാക്കള്‍ കയ്യടക്കിയാലും സൗദിയുടെ പതനം ആണ് സ്വപ്നം ... അല്ലാഹുവില്‍ ശരണം...




 

ശൈഖുല്‍ ഇസ്‌ലാം ഇബ്നു തൈമിയ റഹിമഹുല്ലയുടെ വാക്കുകള്‍ ശ്രദ്ധിക്കുക : "റാഫിദിയാക്കള്‍ (ശിയാക്കള്‍) നിന്ദ്യരായ ഒരു സമൂഹമാണ് . നേരായ ചിന്തയോ, ആധികാരികമായ പ്രമാണമോ, സ്വീകാര്യ യോഗ്യമായ മതമോ, കെട്ടുറപ്പുള്ള ഭൗതിക സംവിധാനങ്ങളോ ഇല്ലാത്ത ഒരു വിഭാഗം" . - [إقتضاء الصراط المستقيم 2/815 ].


അബ്ദുല്ലാഹിബ്നു സബഅ് എന്ന ജൂതന്റെ ആശയമായ ശിയാഇസത്തിനെതിരെ മുസ്‌ലിം രാഷ്ട്രങ്ങളെ ഒന്നിപ്പിച്ച അല്ലാഹുവിന് സര്‍വ്വ സ്തുതിയും.. അല്‍ഹംദു ലില്ലാഹ് ....


അനുബന്ധ ലേഖനം : ഹൂഥികളും ചില കേരളീയരും തമ്മില്‍ അവിഹിത  ബന്ധമോ ?!.

ഇസ്‌ലാമിന്‍റെ പതനത്തിനായി അകത്തു നിന്നും പുറത്ത് നിന്നും കോപ്പുകൂട്ടുന്ന ശത്രുക്കള്‍ക്കെതിരെ മലിക് ഫൈസല്‍ (റഹിമഹുല്ല) നടത്തിയ സംസാരം ഇവിടെ വീണ്ടും പ്രസക്തമാകുന്നു :

കച്ചവടം - ഒരു കര്‍മശാസ്ത്ര പഠനം part 1. [ആമുഖം, കരാറുകളുടെ ഇനങ്ങള്‍].

(വാട്ട്സാപ്പിലൂടെ നമ്മള്‍ നടത്തുന്ന കച്ചവടത്തെ സംബന്ധിച്ചുള്ള കര്‍മശാസ്ത്രപഠനം ടൈപ്പ് ചെയ്തതാണ് ഇത്. അത് ആളുകള്‍ക്ക് ലഭിക്കാവുന്ന രൂപത്തില്‍ ടൈപ്പ് ചെയ്ത് നല്‍കിയ സഹോദരന് അല്ലാഹു ഇഹത്തിലും പരത്തിലും തക്കതായ പ്രതിഫലം നല്‍കട്ടെ)

الحمد لله و الصلاة والسلام على رسول الله، وعلى آله و صحبه ومن والاه، وبعد؛

അല്ലാഹുവിനെ സൂക്ഷിച്ചു ജീവിക്കണമേ എന്ന്‍ ആദ്യമായി ഉണര്‍ത്തുകയാണ് ...

കച്ചവട സംബന്ധമായി ഹ്രസ്വമായ ഒരു ധാരണ ആളുകള്‍ക്ക് ഉണ്ടാക്കുവാനുള്ള ഒരു എളിയ ശ്രമത്തിനാണ് ഇവിടെ തുടക്കം കുറിക്കുന്നത്. അത് പൂര്‍ത്തീകരിക്കാന്‍ അല്ലാഹു തൗഫീഖ് നല്‍കുമാറാകട്ടെ .. ആമീന്‍..

നമ്മുക്കറിയുന്നത് പോലെ പണ്ഡിതന്മാര്‍ അവരുടെ കര്‍മ്മശാസ്ത്ര ഗ്രന്ഥങ്ങളില്‍ ആരാധനകളെക്കുറിച്ചാണ് പൊതുവേ ആദ്യം സംസാരിക്കാറുള്ളത്. അതില്‍ ഏറ്റവും പ്രാധാന്യം ഉള്ളത് നമസ്കാരത്തിനായത് കൊണ്ട്, ആ നമസ്കാരത്തെ സംബന്ധിച്ച് ആണ് ആരാധനകളില്‍ അവര്‍ ആദ്യം സംസാരിക്കാറുള്ളത് , നമസ്കാരത്തിന് ഏറ്റവും അനിവാര്യമായ ഘടകം ശുദ്ധിയായത് കൊണ്ട് തന്നെ ശുദ്ധീകരണത്തെ സംബന്ധിച്ച് ചര്‍ച്ച ചെയ്യുന്ന അധ്യായം ആദ്യം എന്ന നിലക്കാണ് അവര്‍ കര്‍മശാസ്ത്ര ഗ്രന്ഥങ്ങള്‍ രചിച്ചിട്ടുള്ളത്. അതിന് ശേഷമാണ് 'മുആമലാത്ത്' അഥവാ ഇടപാടുകളെക്കുറിച്ച് സംസാരിക്കാറുള്ളത്.

ചില പണ്ഡിതന്മാര്‍ ആരാധനകള്‍ക്ക് മുന്‍പായി തൗഹീദും, അമലുകളുടെ മഹത്വവും അവരുടെ ഫിഖ്‌ഹ് ഗ്രന്ഥങ്ങളില്‍ തന്നെ വിശദീകരിക്കും. രണ്ട് രൂപത്തിലുള്ള ക്രോഡീകരണങ്ങളായാലും പൊതുവേ ആരാധനകള്‍ക്ക് ശേഷമാണ് പണ്ഡിതന്മാര്‍ മുആമലാത്തുകള്‍ ചര്‍ച്ച ചെയ്യാറുള്ളത്. കാരണം ഒരു മനുഷ്യനെ സംബന്ധിച്ച് അല്ലാഹുവുമായുള്ള അവന്റെ ബന്ധമാണല്ലോ 'ആരാധന' എന്നുള്ളത്. അത് മനസ്സിലാക്കിയാല്‍ അവന്‍ സുപ്രധാനമായി മനസ്സിലാക്കേണ്ടത്  തന്റെ സഹജീവികളായ മനുഷ്യരുമായി ബന്ധപ്പെടുന്ന മേഘലയില്‍ അവന്‍ പാലിച്ചിരിക്കേണ്ട നിയമങ്ങളെക്കുറിച്ചാണ്. അതാണ്‌ أحكام المعاملات . 

ഇസ്‌ലാം പൂര്‍ണ്ണമാണ്, സമ്പൂര്‍ണ്ണമാണ്. മനുഷ്യ ജീവിതത്തിന്റെ സര്‍വ്വ മേഘലകളുമായി ബന്ധപെട്ടും അവനുള്ള മാര്‍ഗ്ഗനിര്‍ദേശങ്ങളും നിയമങ്ങളും ഇസ്‌ലാം അനുശാസിക്കുന്നുണ്ട്. മനുഷ്യര്‍ പരസ്പരമുള്ള ബന്ധവും ഇടപാടുകളും നിയന്ത്രണ വിധേയമാക്കുകയും ഓരോരുത്തരുടേയും അവകാശങ്ങളെ സംരക്ഷിക്കുകയും ചെയ്യുകയാണ് ആ നിയമങ്ങളുടെ ലക്ഷ്യം.

അല്ലാഹു പറഞ്ഞുവല്ലൊ :

الْيَوْمَ أَكْمَلْتُ لَكُمْ دِينَكُمْ وَأَتْمَمْتُ عَلَيْكُمْ نِعْمَتِى وَرَضِيتُ لَكُمُ الأِسْلاَمَ دِيناً

ഇന്ന് ഞാന്‍ നിങ്ങള്‍ക്ക് നിങ്ങളുടെ മതം പൂര്‍ത്തിയാക്കിത്തന്നിരിക്കുന്നു. എന്റെ അനുഗ്രഹം നിങ്ങള്‍ക്ക് ഞാന്‍ നിറവേറ്റിത്തരികയും ചെയ്തിരിക്കുന്നു. മതമായി ഇസ്ലാമിനെ ഞാന്‍ നിങ്ങള്‍ക്ക് തൃപ്തിപ്പെട്ട് തന്നിരിക്കുന്നു.
(വിശുദ്ധ ഖുര്‍ആന്‍ 5:3)

അതിനാല്‍ തന്നെ അല്ലാഹു എല്ലാം നമുക്ക് വ്യക്തമാക്കിത്തന്നിട്ടുണ്ട്.അല്ലാഹുവിന് സര്‍വ്വ സ്തുതിയും.

നേരത്തത്തെ സൂചിപ്പിച്ച പോലെ ഇബാദത്തുകള്‍ക്ക് ശേഷം പണ്ഡിതന്മാര്‍ المعاملات അഥവാ മനുഷ്യര്‍ പരസ്പരമുള്ള ഇടപാടുകളെക്കുറിച്ച് ആണ് വിശദീകരിക്കാറുള്ളത്. അതില്‍ തന്നെ പൊതുവേ ആദ്യം കച്ചവടസംബന്ധമായ വിഷയങ്ങളാണ് ചര്‍ച്ച ചെയ്യാറുള്ളത്. മനുഷ്യരെല്ലാവരും തൊഴില്‍ ചെയ്ത് ജീവിക്കുന്നത് കൊണ്ട് തന്നെ, അത് സംബന്ധമായ നിയമങ്ങളും അവര്‍ അറിയേണ്ടതും പഠിക്കേണ്ടതുമുണ്ട്. അതിന്റെ ഇനങ്ങള്‍, നിയമങ്ങള്‍, പാലിക്കേണ്ട മര്യാദകള്‍ മുതലായ കാര്യങ്ങള്‍ ചര്‍ച്ച ചെയ്ത ശേഷം പിന്നീട് വിവാഹത്തെ സംബന്ധിച്ച് ത്വലാഖിനെ സംബന്ധിച്ചുമെല്ലാം വിശദീകരിക്കുന്നത് കാണാം.
തൊഴില്‍, വിവാഹം എന്നതെല്ലാം പതിപാദിച്ച ശേഷം അനന്തരവകാശം പിന്നെ മനുഷ്യന്മാര്‍ തമ്മിലുള്ള പ്രശ്നങ്ങളെ പരിഹരിക്കാനുള്ള ശിക്ഷാ നിയമങ്ങള്‍,  ജിഹാദ്, ദഅ'വ തുടങ്ങിയ കാര്യങ്ങളെല്ലാം തന്നെ ചര്‍ച്ച ചെയ്തുകൊണ്ടാണ് ഒരു ഫിഖ്‌ഹ് ഗ്രന്ഥം അവസാനിക്കുന്നത്. കര്‍മശാസ്ത്രപഠനത്തെ സംബന്ധിച്ച് അതിന്‍റെ ഒരു രൂപവും രീതിയും അറിഞ്ഞിരിക്കാനാണ് വിഷയങ്ങള്‍ ക്രോഡീകരിക്കപ്പെട്ട രൂപത്തെ സംബന്ധിച്ച് വിശദീകരിച്ചത്.

എന്നാല്‍ ഇതില്‍ കച്ചവടവുമായി ബന്ധപ്പെട്ട ഭാഗം അഥവാ كتاب البيوع ആണ് നാം പഠന വിധേയമാക്കുന്നത്. കച്ചവടത്തെക്കുറിച്ച് ഒരു ഹൃസ്വമായ ധാരണ ലഭിക്കുവാന്‍ വേണ്ടി നാം ഇവിടെ അവലംബിക്കുന്നത് സൗദി അറേബ്യയില്‍ നിന്നും പ്രസിദ്ധീകരിക്കപ്പെടുന്ന محمد بن إبراهيم التويجري എന്ന പണ്ഡിതന്‍ രചിച്ച  مختصر الفقه الإسلامي എന്ന ഗ്രന്ഥത്തെയാണ്.. ഇന്‍ ഷാ അല്ലാഹ്..
-------------------------------------------

കച്ചവടത്തിന്റെ വിഷയത്തിലേക്ക് പോവുന്നതിനു മുമ്പ് ആദ്യമായി ഇസ്‌ലാമില്‍ ഉള്ള കരാറുകളെ മൂന്ന്‍ ആയി തരം തിരിക്കാം.

أقسام العقود ثلاثة: (ഇടപാടുകളുടെ ഇനങ്ങള്‍ മൂന്നെണ്ണമാണ്)


ഒന്ന്‍:  عقد معاوضة محضة
(പരസ്പരമുള്ള ഒരു കച്ചവട കരാര്‍. കച്ചവടവും കൈമാറ്റവും ആണ് ഈ കരാറിലെ പ്രധാന ലക്ഷ്യം)

ഉദാ : البيع കച്ചവടം, الإجارة വാടക



എന്നാല്‍ കച്ചവടത്തില്‍ പോലും ഓരോ ആളുടെയും നിയ്യത്തനുസരിച്ച് പ്രതിഫലം ലഭിക്കും. വിട്ടു വീഴ്ച്ച മനോഭാവത്തോടെ കച്ചവടം നടത്തിയാല്‍ പുണ്യം ലഭിക്കും എന്ന്‍ റസൂല്‍ (സ) പറഞ്ഞിട്ടുണ്ട്. അത് വഴിയേ വിശദീകരിക്കുന്നതാണ്.

രണ്ട്: عقد تبرع محض
പരിപൂര്‍ണ്ണമായി ധര്‍മ്മം ഉദ്ദേശിച്ച് കൊണ്ടുള്ള കരാര്‍

ഉദാ : كالهبة، والصدقة، والعارية، والضمان
هدية (Gift), صدقة (ദാനധര്‍മ്മം), والعارية (ഒരു വസ്തു പ്രതിഫലം ഈടാക്കാതെ ഉപയോഗിക്കാന്‍ നല്‍കല്‍), والضمان (ഗ്യാരണ്ടീ നില്‍ക്കല്‍)
മൂന്ന്‍ : عقد تبرع ومعاوضة .

ധര്‍മ്മവും, കൈമാറ്റവും ചേര്‍ന്നുവരുന്ന കരാര്‍

ഉദാ : കടം കൊടുക്കല്‍. കടം കൊടുക്കല്‍ ഒരു സഹായമാണ്. അതേ സമയം ആ സഹായം ചെയ്യുമ്പോഴും നാം കടം നല്‍കിയ വസ്തുവിന് തതുല്യമായ വസ്തു നാം തിരികെ ആവശ്യപ്പെടുന്നുണ്ട്. അതിനാലാണ് ധര്‍മ്മവും കൈമാറ്റവും ചേര്‍ന്നുവരുന്ന കരാര്‍ എന്ന് പറയുന്നത്.

------------------------

ഇസ്‌ലാമിലുള്ള കരാറുകളുടെ ഇനങ്ങള്‍ ശ്രദ്ധിച്ചാല്‍, അതില്‍ നമ്മള്‍ മനസ്സിലാക്കേണ്ടുന്ന ഒരു കാര്യം, ലാഭത്തെ മാത്രം മുന്‍നിര്‍ത്തിയുള്ള ഇടപാടുകളല്ല ഇസ്‌ലാമിലുള്ളത് എന്നതാണ്.

ലാഭമുള്ളവയും, പരസ്പരം സഹായവും / സഹകരണവും മാത്രം പ്രതീക്ഷിച്ചുകൊണ്ടുള്ളതും ഇസ്‌ലാമിക ഇടപാടുകളിലുണ്ട്. അഥവാ ഭൗതിക നേട്ടം മാത്രമല്ല പാരതത്രീക മോക്ഷം കൂടി മുന്‍നിര്‍ത്തിയാണ് അവ നിലകൊള്ളുന്നത്. ലാഭവും ഭൗതിക സുഖവും മാത്രം മുന്നില്‍ കാണുന്ന  നല്‍കപ്പെട്ട ഭൗതിക വാദികള്‍ക്കും അവരുടെ സ്വാര്‍ത്ഥ ചിന്താഗതിക്കും അത് സാമൂഹിക സാമ്പത്തിക മേഖലകളില്‍ വരുത്തിവെക്കുന്ന വിനകള്‍ക്കും ഇസ്‌ലാം ഇവിടെ വ്യക്തമായ മറുപടി നല്‍കുന്നുണ്ട്.

പരലോക ജീവിതത്തെക്കുറിച്ചുള്ള ബോധ്യമോ, ദൈവഭയമോ ഇല്ലാത്ത ഒരാള്‍ എന്തിന്  പരസ്പര സഹായവും, തന്റെ ഇടപാടുകളിലുള്ള സത്യസന്ധതയും സുതാര്യതയുമെല്ലാം ആഗ്രഹിക്കണം ?!. സ്വാഭാവികമായും അവന്റെ ലക്ഷ്യം അവന്റെ ഭൗതിക നേട്ടങ്ങള്‍ മാത്രമായിരിക്കും.  അതിനാലാണ് സത്യസന്ധവും സുതാര്യതയും പരസ്പരസഹായവും മുഖമുദ്രയായ, നീതിപൂര്‍വകമായ ഒരു സമ്പദ് രംഗം ഉണ്ടാവണമെങ്കില്‍ തൗഹീദ് അനിവാര്യമാണ്. ഏകദൈവ വിശ്വാസത്തിനും പരലോകബോധത്തിനും മാത്രമേ അത്തരം ഒരു മാറ്റം മനുഷ്യരില്‍ ഉണ്ടാക്കാന്‍ സാധിക്കൂ. അതില്ലാത്തവന് അവന്റെ നേട്ടങ്ങളും ലക്ഷ്യങ്ങളും മാത്രമായിരിക്കും പ്രധാനം അതിലേക്കുള്ള വഴികളുടെ ന്യായാന്യായങ്ങളെപ്പറ്റി അവന്‍ തിരക്കില്ല.

അതുകൊണ്ട് മനുഷ്യ ഇടപാടുകളെ നിയന്ത്രിക്കുന്നതിലെ സുപ്രധാന ഘടകം തൗഹീദ് തന്നെയാണ്. അല്ലാഹുവിന്റെ പ്രതിഫലവും തൃപ്തിയും മാണ് എന്റെ സുപ്രധാനലക്ഷ്യം, സമ്പത്ത് തരുന്നത് അല്ലാഹുവാണ് അതിനാല്‍ അത് അവന്റെ നിയമപ്രകാരം വിനിയോഗിക്കേണ്ടതുണ്ട് എന്ന ഉറച്ച ബോധ്യം നിങ്ങളിലുണ്ടോ നിങ്ങളുടെ സമ്പദ് രംഗം നന്നാക്കുവാന്‍ നിങ്ങളെ അത് സഹായിക്കും തീര്‍ച്ച ....








തുടരും ....

മേൽവാടകക്ക് നല്കുന്നതിന്റെ വിധിയെന്ത്‌ ?

الحمد لله و الصلاة والسلام على اشرف خلق الله، وعلى آله و صحبه ومن والاه، وبعد؛

വസ്തുവിന്‍റെ ഉടമസ്ഥനില്‍ നിന്നും വാടകക്ക് എടുത്ത വ്യക്തി തന്റെ കരാര്‍ കാലയളവില്‍ ആ വസ്തുമറ്റൊരാള്‍ക്ക് വാടകക്ക് നല്‍കുന്നതിനാണ് 'മേല്‍വാടകക്ക് നല്‍കല്‍' എന്ന് പറയുന്നത്. 

ഇസ്‌ലാം വാടകക്ക് നൽകുന്നതിനെയും. വാടകക്ക് എടുത്ത ആൾ അത് മറ്റൊരാൾക്ക് മറിച്ച് വാടകക്ക് നൽകുന്നതിനെയും എതിർക്കുന്നില്ല. കാരണം താൻ വാടകക്കെടുത്തത് സ്വയം ഉപയോഗപ്പെടുത്തുന്നതിനോ, തല്‍സ്ഥാനത്ത് മറ്റൊരാള്‍ ഉപയോഗപ്പെടുത്തുന്നതിനോ അയാൾക്ക് അനുവാദമുണ്ട്. എന്നാൽ വസ്തുവിൻറെ ഉടമ വാടകക്ക് നൽകുന്ന സമയത്ത് മറ്റൊരാള്‍ക്ക് വാടകക്ക് നൽകരുത് എന്ന നിബന്ധന വച്ചിട്ടുണ്ടെങ്കിൽ, ആ വസ്തു മേൽവാടകക്ക് നൽകാൻ പാടില്ല.

അതുകൊണ്ട് തന്നെ വസ്തുവിന്‍റെ ഉടമ കരാറിലേര്‍പ്പെടുന്ന സമയത്ത് മേല്‍വാടകക്ക് നല്‍കുന്നത് വിലക്കാത്ത പക്ഷം മേല്‍വാടകക്ക് നല്‍കല്‍ അനുവദനീയമാണ്. 

ലിജ്നതുദ്ദാഇമയുടെ ഈ ഫത്'വ നോക്കുക :

ചോദ്യം: ഈ വിഷയത്തിലുള്ള മതവിധി ഒന്ന് വ്യക്തമാക്കണം.... അല്ലാഹു നിങ്ങളെ അനുഗ്രഹിക്കട്ടെ.

 ഒരു ബിൽഡിങ്ങിന്റെ ഉടമസ്ഥൻ അദ്ദേഹത്തിന് വാടകക്കാരെ ഓരോരുത്തരെയും സമീപിച്ച് വാടക സ്വീകരിക്കാനും, ബിൽഡിങ്ങിന്റെ മറ്റു കാര്യങ്ങൾ നിറവേറ്റുവാനുമുള്ള പ്രയാസത്താല്‍,,,, മൊത്തത്തിൽ ഒരാൾക്ക് നൽകിയാൽ അയാളുമായി മാത്രം ഇടപാട് നടത്തിയാൽ മതിയല്ലോ എന്ന നിലക്ക് ബിൽഡിംഗ് മൊത്തമായും  100000 റിയാലിന് എനിക്ക് വാടകക്ക് നൽകുകയും അത് മേൽവാടകക്ക് നൽകുവാനുള്ള അനുവാദം നൽകുകയും ചെയ്തു. ആ ബിൽഡിംഗ് ഏറ്റെടുത്ത ശേഷം അതില്‍ ഞാൻ ഫർണീച്ചറുകളും ഫ്രിഡ്ജും തുടങ്ങി വീട്ടു സാധനങ്ങൾ ഒരുക്കി, റൂമുകളും ഫ്ലാറ്റുകളുമാക്കിത്തിരിച്ച് 150000 റിയാലിന് വാടകക്ക് നൽകി. ക്ലീനിംഗ് ജോലിക്കാരുടെയും സെക്യൂരിറ്റി ജീവനക്കാരുടെയും തുടങ്ങി,, ചിലവുകൾ കഴിച്ച് അതിൽ നിന്നും ബാക്കിയാകുന്ന ലാഭം എനിക്ക് അനുവദനീയമാണോ ? . താമസക്കാർക്ക് വേണ്ട സഹായങ്ങളും സേവനങ്ങളും ചെയ്ത് കൊടുക്കുന്നതിൽ ഞാൻ ഒരു വീഴ്ചയും വരുത്തുന്നില്ല.

ഉത്തരം  :  ഒരാള്‍ ഒരു വസ്തു വാടകക്കെടുത്താല്‍ താന്‍ വാടകക്ക് എടുത്ത അതേ വാടക തന്നെ നിശ്ചയിച്ചുകൊണ്ടോ , അതല്ലെങ്കില്‍ അതിനേക്കാള്‍ കൂടുതലോ, കുറവോ ആയ വാടക നിശ്ചയിച്ചുകൊണ്ടോ മറ്റൊരാള്‍ക്കത് വാടകക്ക് നല്‍കാവുന്നതാണ്. താനെത്ര കാലാവധിക്കാണോ വാടകക്കെടുത്തത് അത്ര തന്നെ കാലാവധിക്കോ അതിനേക്കാള്‍ കുറവ് കാലാവധിക്കോ മറ്റൊരാള്‍ക്ക് വാടകക്ക് നല്‍കാം. എന്നാല്‍ വസ്തുവിന്‍റെ  ഉടമസ്ഥന് ഉപദ്രവമുണ്ടാകുമെന്നതിനാല്‍ താന്‍ വാടകക്ക് എടുത്ത കാലാവധിയേക്കാള്‍ കൂടുതല്‍ കാലാവധി നിശ്ചയിച്ചുകൊണ്ട് മറ്റൊരാള്‍ക്ക് മറിച്ച് വാടകക്ക് നല്‍കാന്‍ പാടില്ല.

   വാടകക്കെടുത്ത വസ്തു വാടകക്കാല പരിധിയില്‍ അയാള്‍ക്ക് ഉപയോഗപ്പെടുത്താമെങ്കില്‍ അതയാള്‍ സ്വയം ഉപയോഗപ്പെടുത്തുന്നതിനോ അയാള്‍ക്ക് പകരം മറ്റൊരാള്‍ ഉപയോഗപ്പെടുത്തുന്നതിലോ തെറ്റില്ല. എന്നാല്‍ വസ്തുവിന്‍റെ ഉടമസ്ഥന്‍ വാടകക്ക് തരുന്ന അവസരത്തില്‍ തന്നെ ഇത് മറിച്ച് മറ്റൊരാള്‍ക്ക് വാടകക്ക് നല്‍കരുതെന്നോ, അല്ലെങ്കില്‍ ഇന്നയിന്ന തൊഴിലാളികള്‍ക്കോ ജോലിക്കാര്‍ക്കോ നല്‍കരുതെന്നോ നിബന്ധനകള്‍ വച്ചിട്ടുണ്ടെങ്കില്‍ അപ്രകാരം ചെയ്യാന്‍ പാടില്ല. അവര്‍ നിബന്ധനപ്രകാരമാണ് കരാറില്‍ ഏര്‍പ്പെട്ടതെങ്കില്‍ രണ്ടുപേരും അത് പാലിക്കാന്‍ ബാധ്യസ്ഥരാണ്.

ഈ ഫത്'വ നല്‍കിയത് :  ശൈഖ് ഇബ്ന്‍ ബാസ് (റഹിമഹുല്ല) , ശൈഖ് അബ്ദുല്‍ അസീസ്‌ ആലു ശൈഖ് (ഹഫിദഹുല്ല) , ശൈഖ് സ്വാലിഹ് അല്‍ ഫൗസാന്‍ (ഹഫിദഹുല്ല) , ശൈഖ് ബകര്‍ അബൂ സൈദ്‌ (റഹിമഹുല്ല) .

ഈ ഫത്'വയുടെ അറബി ലഭിക്കാന്‍ഇവിടെ ക്ലിക്ക് ചെയ്യുക


ഇനി ഇവിടെ നാം പ്രത്യേകം ശ്രദ്ധിക്കേണ്ട രണ്ട് കാര്യങ്ങള്‍: 

ഒന്ന്: നാട്ടുനടപ്പനുസരിച്ച് പൊതുവേ ഉടമസ്ഥര്‍  മേല്‍വാടകക്ക് നല്‍കാന്‍ അനുവദിക്കാത്ത വസ്തുക്കളോ, ഇനി നാട്ടുനടപ്പനുസരിച്ച് മേല്‍വാടകക്ക് നല്‍കുന്നതിന് പ്രത്യേകം അനുവാദം ഉടമസ്ഥനില്‍ നിന്ന് വാങ്ങേണ്ടതോ ഉണ്ടെങ്കില്‍ അത്തരം ഒരു സാഹചര്യത്തില്‍ ഉടമസ്ഥന്റെ അനുവാദത്തോടുകൂടിയല്ലാതെ മേല്‍വാടകക്ക് നല്‍കാന്‍ പാടില്ല.

അഥവാ : നാട്ടുനടപ്പനുസരിച്ച് പൊതുവേ മേല്‍വാടകക്ക് നല്‍കാന്‍ ഉടമസ്ഥര്‍ അനുവാദം നല്‍കാത്ത വസ്തുക്കളുടെ കാര്യത്തില്‍ ഉടമസ്ഥനില്‍ നിന്നും പ്രത്യേകം അനുമതി ഉണ്ടെങ്കിലേ മേല്‍വാടകക്ക് കൊടുക്കാവൂ. എന്നാല്‍ നാട്ടുനടപ്പനുസരിച്ച് പൊതുവേ മേല്‍വാടകക്ക് നല്‍കപ്പെടുന്ന വസ്തുക്കളുടെ കാര്യത്തില്‍ ഉടമസ്ഥന്റെ പ്രത്യേകം അനുവാദം ആവശ്യമില്ല.  താന്‍ അതിഷ്ടപ്പെടുന്നില്ലെങ്കില്‍ കരാര്‍ സമയത്ത് മേല്‍വാടകക്ക് നല്‍കരുത് എന്ന നിബന്ധന ഉടമസ്ഥന്‍ വെക്കണം എന്നര്‍ത്ഥം.

രണ്ട്: കരാര്‍ സമയത്ത് പരസ്പരം വച്ചിട്ടുള്ള നിബന്ധനകള്‍ പാലിക്കല്‍ ഉടമസ്ഥനും വാടകക്കാരനും നിര്‍ബന്ധമാണ്‌.

കാരണം പ്രവാചകന്‍ (ﷺ) പറഞ്ഞു :

المسلمون عند شروطهم 

"മുസ്‌ലിമീങ്ങള്‍ അവര്‍ പരസ്പരം കരാര്‍ ചെയ്ത നിബന്ധനകള്‍ പാലിക്കുന്നവരാണ് " - [തിര്‍മിദി].