Wednesday, April 28, 2021

കോവിഡ് ടെസ്റ്റ്, വാക്സിൻ ഇവ മുഖേന നോമ്പ് മുറിയുമോ ? മറുപടി പ്രതീക്ഷിക്കുന്നു.


ചോദ്യം: കോവിഡ് ടെസ്റ്റ്, വാക്സിൻ ഇവ മുഖേന നോമ്പ് മുറിയുമോ ?മറുപടി പ്രതീക്ഷിക്കുന്നു.


www.fiqhussunna.com 

ഉത്തരം: 

الحمد لله والصلاة والسلام على رسول الله وعلى آله وصحبه ومن والاه ، وبعد؛ 

കോവിഡ് ടെസ്റ്റ് ചെയ്തത് കൊണ്ടോ , വാക്‌സിൻ സ്വീകരിച്ചത് കൊണ്ടോ നോമ്പ് മുറിയുകയില്ല. ഒരാൾ തൻ്റെ ശരീരത്തിലേക്ക് കുത്തിവെപ്പിലൂടെ സ്വീകരിക്കുന്ന മരുന്നുകളെ രണ്ടായി തരം തിരിക്കാം. ഒന്ന് ഭക്ഷണ പാനീയങ്ങൾക്ക് പകരമാകുന്നത്, മറ്റൊന്ന് ഭക്ഷണ പാനീയങ്ങൾക്ക് പകരമാകാത്തവ. 

ഇതിൽ രോഗിക്ക് ഗ്ലൂക്കോസ് കയറ്റുന്നത് പോലെ  ഭക്ഷണ പാനീയങ്ങൾക്ക് പകരമായി ഗണിക്കാവുന്നവയാണ് എങ്കിൽ അവ നോമ്പ് മുറിയാൻ കാരണമാകും. എന്നാൽ അല്ലാത്തവ നോമ്പ് മുറിയാണ് കാരണമാകുകയില്ല.

അതുകൊണ്ടുതന്നെ ഇൻസുലിൻ , ലോക്കൽ അനസ്തേഷ്യ, വാക്‌സിൻ ഇവയൊന്നും നോമ്പ് മുറിയാണ് കാരണമാകുകയില്ല. 

ജിദ്ദയിൽ നടന്ന അന്താരാഷ്‌ട്ര ഫിഖ്ഹ് അക്കാദമിയുടെ കോൺഫറൻസിൽ ഈ വിഷയം ചർച്ച ചെയ്ത ശേഷം അവർ എത്തിച്ചേർന്ന തീരുമാനങ്ങളിൽ ഇപ്രകാരം കാണാം: 

 "الأمور الآتية لا تعتبر من المفطرات : الحُقن العلاجية الجلدية أو العضلية أو الوريدية، باستثناء السوائل والحقن المغذية"

"ഈ പറയുന്ന കാര്യങ്ങൾ നോമ്പ് മുറിയുന്നവയിൽ പെടുകയില്ല: ഭക്ഷണ പാനീയങ്ങൾക്ക് പകരമാകുന്ന ഇഞ്ചക്ഷനുകളും മെഡിസിനുകളും ഒഴികെ   തൊലിയിലോ, മസിലിലോ , ഞരമ്പിലോ എടുക്കുന്ന ചികിത്സാ ഇഞ്ചക്ഷനുകൾ നോമ്പ് മുറിക്കുകയില്ല"  - 

[قرار مجمع الفقه الإسلامي المنعقد في دورة مؤتمره العاشر بجدة في المملكة العربية السعودية خلال الفترة من 23-28 صفر 1418هـ الموافق 28 - حزيران (يونيو) - 3 تموز (يوليو) 1997م]  

അതുപോലെ ശൈഖ് ഇബ്നു ബാസ് (റ) യോട് ഈ വിഷയം ചോദിക്കപ്പെട്ടു: 

" هل حقن التطعيم تؤثر على الصيام؟".

ചോദ്യം: വാക്‌സിനേഷൻ ഇഞ്ചക്ഷനുകൾ നോമ്പിനെ ബാധിക്കുമോ ?. 

അദ്ദേഹം പറഞ്ഞു: 

" لا تؤثر، الصيام صحيح، فالإبر التي للتطعيم، والإبر التي للعلاج لا تؤثر على الصحيح، إلا الإبر التي للتغذية، الحقن التي للتغذية، فهذه التي تؤثر، أما الإبر العادية، الحقن العادية للتطعيم وغيره؛ فإن الصواب أنها لا تؤثر، والصوم صحيح.

"ഇല്ല. അവ നോമ്പിനെ ബാധിക്കുകയില്ല. വാക്സിൻ എടുത്താലും നോമ്പ് സാധുവാണ്. ഭക്ഷണപാനീയങ്ങൾക്ക് പകരമാകുന്ന കുത്തിവെപ്പുകളല്ലാതെ,  വാക്സിനേഷനും മറ്റു ചികിത്സാ ആവശ്യങ്ങൾക്കുള്ള ഇഞ്ചക്ഷനുമൊന്നും  നോമ്പിനെ ബാധിക്കുകയില്ല. ഭക്ഷണപാനീയങ്ങൾക്ക് പകരമാകുന്ന രൂപത്തിലുള്ളവ നോമ്പിനെ ബാധിക്കും. എന്നാൽ സാധാരണ വാക്സിനേഷനും മറ്റുമൊക്കെയായിട്ടുള്ള ഇഞ്ചക്ഷനുകളാകട്ടെ ശരിയായ അഭിപ്രായപ്രകാരം അവ നോമ്പിനെ ബാധിക്കുകയില്ല. അയാളുടെ നോമ്പ് ശരിയായിരിക്കും". - [https://binbaz.org.sa/fatwas/28463/].

അതുകൊണ്ടുതന്നെ കോവിഡ് വാക്സിൻ എടുക്കുന്നതു കോവിഡ് ടെസ്റ്റ് നടത്തുന്നതോ ഒന്നും തന്നെ നോമ്പ് മുറിയാണ് ഇടവരുത്തുകയില്ല. 

അല്ലാഹു അനുഗ്രഹിക്കട്ടെ... 

___________________________

അബ്ദുറഹ്മാൻ അബ്ദുല്ലത്തീഫ് PN